ACARA NATAL KELUARGA HKBP REST. TIGALINGGA

ACARA NATAL KELUARGA HKBP REST. TIGALINGGA

Thema :

“Paboa hamu ma ro di ujung ni tano on: Ida ma, nunga ro hatuaonmi!”

(Jesaya 62:11b)

 26 Desember 2015

I. Patujolo

1.     Diparade ma lilin 4 biji sipagalahon di tingki marende parjolo

2.     Namanguluhon, dipillit ganup keluarga ma.

3.     Papungu pelean do hita, sipasahaton tu Huria

II. Acara Natal

1.   Marende No. 57:1-2    “Nunga jumpang muse”

v  Nunga jumpang muse ari pesta i, hatutubu ni Tuhanta Jesus i. Tuat do Ibana sian surgo i, mebat tu hita on. Hasangapon di Debata, dame-dame ma di jolma,Las ni roha ni Debata hajolmaon muse.

v  Beta ale dongan tu Betlehem i, itasomba ma dakdanak na disi. Na tinongos ni parasiroha i Debata Ama i. Hasangapon di Debata....du,

2.   Votum

U: Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on, amen.

R: Nunga  patar hagoluan i, jala nunga huida hami jala hubaritahon hami taringot tu hangoluan sogot na sian Ama i.

U: Ida ma denggan na i dohot sonang na i, molo tung pungu sahundulan angka na marhahamaranggi

R: Sai songon i do dipapungu Jahowa hita ganup marningot hita di hatutubu ni Tuhan Jesus i, marlas ni roha jala marolop-olop.

U: Martangiang ma hita: Ale Tuhan Debata na marasi roha, tung diasi i Ho do hami na lea on, marhite na marsuru AnakMu na sasada i, ima Jesus Kristus Tuhan nami, asa porsea hami jala manjalo hangoluan na saleleng ni lelengna sipapataronMu tu tonga-tonga nami. Sai rajai jala togu-togu ma hami marhite-hite TondiM, asa lam huida hami holong ni rohaM. Sai sorang ma Ho di tonga-tonga ni bagas nami asa sai mardame hami tongtong diadopanMu.

S:  Amen.

3.   Marende No. 62 :1     “Halalas ni roha godang”

v  Halalas ni roha godang na hubaritahon on.

  Nunga tubu sipalua di hita jolma on.

  Hasangapon di Debata laos dame-dame, dame ma di jolma.

  Lomo ni roha ni Debata do hita jolma on.

4.     Liturgi:

a.   Dakdanak : Liturgi na sian gareja ma manang sian singkola

b.   Molo adong puisi manang deklamasi.

c.    Na magodang : Lukas 2 : 1-14 (di jaha marsorinsorin)

d.   Ayat 14 (rap manjaha ma sudena keluarga)

5.   Marende No. 53 : 1    “Di Betlehem do tubu”

v Di Betlehem do tubu di hita Anak i. I do sian na burju hupillit rajangki.    I do, i do hupillit rajangki.

6.   Renungan Natal :     Lukas 2:10

“Unang mabiar hamu; ai barita halalas ni roha godang do huboan tu hamuna, parsaulian ni sandok bangso i”

Selamat ari Natal ma di hita saluhutna! Marlas ni roha do hita bodari on, jala tadok do selamat ari Natal! Hea do ulaning tarimang-rimangi boasa molo di tingka ari “Natal” tadok “ Selamat” (horas di hata Batak). Aha do lapatan ni “Selamat manang horas”. Lapatanna ima ala malua sian parmaraan, malua sian ihot-ihot angka na mangihoti ngolunta.

Marlas ni roha jala marolopolop do hita ganup jumpang ari natal. Ala disi ma tarida hinabalga ni holong ni roha ni Debata di nasa natinompaNa. Marhite hatutubuNa di huta Belehem, tanda ma hinauli ni holong-Na tu jolma na lea jala pardosa. Tudos do jolmai songon birubiru na lilu na so marparmahan masitondong dalanna be. Mauliate ma di na tubu dohot na ro Ibana tu portibi on laho padamehon nasa jolma tu Debata Amai. I do natapestahon dohot natahalashon di natal taon 2015 on. Ai na mago hian do jolma alai gabe jumpang muse dibagasan Tuhan Jesus Kristus i. Marhite hatutubu ni Tuhan Jesus Kristus gabe jumpang ma sondang hatiuron dohot holongNa di portibion na dibagasan haholomon. Hape lam tu ngalina do holong ni roha. Ai na mardongan tubu pe dang marsihaholongan. Boi do i ala ni materi, hepeng na gabe ukuran di pardonganon dohot parsaoran. Molo adong di sasahalak didok ma tuturnami, hape molo pogos holang ma ibana siani. Hatutubu ni Jesus mangalehon las ni roha di hita jala pasintong holong ni rohaNa di natal on. 

Ai loja do hita pasarisari artai gabe jotjot ndang dianturehon be keluarga ianakhon dohot parhuriaon nang hangoluan sisalelenglelengna dibagasan Kristus. Hape sipata do natahalojahoni dang tatanda saluhutna pambahenan ni Debata. Na deba di rahuti utang dohot pandelean na parir situtu. Barita na tajalo marhite natal on, i ma natal keluarga “unang hamu mabiar ai barita halalas ni roha godang do huboan tu hamu parsaulian di sandok bangsoi… “ Asa marpos ni roha hita manjalo hagogoon na sian Ibana gabe taruli di parsaulian gabe mabiar ma hita mangulahon dosa dohot sogo ni roha ni Debata asa tarida parbue ni na tonggi na sian hatutubu ni Kristus i na gabe hataridaan ni hangoluan on. Huhut lam mangarade ma hita mangulahon lomo ni roha ni Debata dibagasan Kristus, ai sude na taulahon di bagasan ibana gabe parsaulian do.  Gabe mampanghorhon pasu-pasu di keluarga, ianakhon, masyarakat, bangsonta, parhuriaon dohot parjambar di hangoluan sisaleleng ni lelengna dibagasan Kristus i.

Na marpungu do hita dibagasan borngin on, angka na marhaha-maranggi dohot mariboto, rap dohot natorasta, na marlas ni roha do hita manghalashon Tuhan Jesus i. Taloas ma Ibana sorang di bagasan jabunta, asa mardame-dame hita ganup ari. Sai dao ma angka parsalisian dohot na masihosoman sian tonga-tonga ni bagasta be. Ingkon masihaposan, masiseasaan dosa jala masihaholongan ma hita. Antong tajanghon ma Ibana dibagasan rohanta be, jala taauhon ma pandohan on: Unang mabiar hamu; ai barita halalas ni roha godang do huboan tu hamuna, parsaulian ni sandok bangso i, Amen.

7.   Marende No. 52 : 1-2   “Hatuaon do” (P. Pelean)

v Hatuaon do las ni roha do hatutubu ni Jesus i,

  Mago do jolma ro ma Tuhanta, las be las be ma rohanta i (2x).

vHatuaon do las ni roha do hatutubu ni Jesus i,

Domu do hita tu Debatanta, las be las be ma rohanta i (2x).

8.   Tangiang Panutup (Ale amanami na di banua ginjang, …)

III. Acara Keluarga diatur ma hombar tu Ringkotna. Huhut masijalangan

·         Pangula na gok tingki :

               - Pdt. Budianto Sianturi

·         SUDE ULUAN NI HURIA HKBP SARESSORT TIGALINGGA

·         SUDE PARHALADO HKBP SARESSORT TIGALINGGA

Pasahathon

SELAMAT ARI NATAL 25-26 DESEMBER 2015

Dohot

TAON BARU 01 JANUARI 2016

Tu

SUDE RUAS NI HURIA HKBP SARESSORT TIGALINGGA (LANSIA, AMA, INA, NAPOSOBULUNG/REMAJA & SIKOLA MINGGU)

SUDE PUNGUAN PARENDE HKBP SARESSORT TIGALINGGA

Sian Las ni roha nami hupasahat hami do Pelean Natal

sian Kel           : _____________________________

Godang na                  : Rp. ……………. (                                                     )