Acara Passion - Jumat Agung, Buhabuha Ijuk

ACARA PARNINGOTAN HAMAMATE NI TUHAN JESUS

SA-RESSORT TIGALINGGA

JUMAT, 25 MARET 2016

01.     Joujou tu parsaoran dohot Debata

U:   Huria ni Tuhanta! Dibagasan serep dohot unduk ni roha tu Debata, tahalashon ma parsaoranta di tongatonga ni bagasjoro on. Parpunguanta sadari on ma puncak ni sude barita panaonon ni Tuhanta Jesus Kristus. Haleaon, insakinsak, reherehe, tijur, tali dohot pastap-pastap, nunga ditaon. Alai ndada holan i, ingkon sahat do Ibana tu hau pinorsilang, asa sae sude utang ni dosanta.

H:   Au on hian do tama manaon i. Ai ala ni pangalaosionku do Ibana tartullang, jala ala ni hajahatongku do Ibana mabugang.

U:   Antong, pabulus ma roham mangendehon, Jesus mual ni ngolungku sipangolu tondingki. Nunga dapotan hangoluan au nuaeng ala hamamateMi, alani pujionku ma goarMu salelenglelengna i. Marende ma hita:

H:   (Mangendehon Ende No. 81: 1-3 Aha ma endehononku)

♪  Jesus mual ni ngolungku, sipangolu tondingki. Ai dibunu Ho musungku, i ma hamatean i. Ho manaoni hamagoan, patupahon hangoluan. Alani hupuji Ho, tung marribu hali do.

♪  Haleaon, insahinsak, reherehe, tijur pe. Tali dohot pastappastap, tung ditaonhon Ho sude. Paluahon au na pogos, sian tangan ni sibolis.  Alani hupuji Ho, tung marribu hali do.

♪  Bugang sada tanggurungmu di na hona linsing  i. Hamamalum ni bugangku na di rohangki do i. Ho do gabe binuraan au dapotan hangoluan. Ala ni hupuji Ho tung  marribu hali do

02.     Votum/ Introitus/ Tangiang

U:   Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on. Amen, Sai unang mandaodao ianggo Ho, ale Jahowa, parsigantunganku, hapogani ma mangurupi ahu. Merus do gogongku songon ngarngar, jala lohot do dilangku di langitlangit ni pamanganhu, jala tu orbuk ni na mate dipapodom Ho ahu. Ale Debatangku! Debatangku! Boasa tung tadingkononMu ahu?

H:   Ai on do dipatupa Debata: Humongkop hita gabe dosa Ibana, na so tumanda dosa, asa gabe hatigoran ni Debata hita di bagasan Ibana.

U:   Arga do hamu ditobus: Dibahen i pasangap hamu ma Debata marhitehite dagingmuna dohot marhitehite tondimuna, ai Debata do nampuna i. Haleluya

H:   (Mangendehon) Haleluya……….Haleluya……….Haleluya……….

U:   Martangiang ma hita:

       Ale Tuhan Jesus, na mate tarsilang do Ho humophop hami halak pardosa, ala ni holong ni rohaM na godang i di hami! Ajari ma hami paingotingot Ho, na targantung di hau na pinarsilang humophop hami, ai Ho do haporusannami maradophon rimas ni Debata dohot panoruion ni Patik dohot panolsolion ni roha. Sai sesa jala urati ma dosa sian rohanami marhitehite TondiM na badia i, jala pargogoi ma hami maralohon roha sibuk dohot hisaphisap dohot sangkap sangkap ni rohanami laho mangihuthon Ho, na mangolu jala na manggomgomi rap dohot Ama i dohot Tondi Parbadia ro di saleleng ni lelengna. Amen.

03.     Marende Huria No. 82: 1-2 (O Jesusku, tu bugangMu)

♪    O Jesusku, tu bugangMu, ro marsomba rohangkon. Sai tarpuji, sai tarpuji, na pamalum tondingkon.

♪    Tung di patMu, o Jesusku, solsolanku rohangki. Tangisanku na tinaonMu, ala jat ni rohangki.

04.     Patik

U:   Patik di Pesta Parningotan Hamamate ni Tuhan Jesus sadari on, i ma na tarsurat di Johannes 13 : 15

U:   Ai sitiruon do hulehon tu hamu, asa dibahen hamu songon naung hubahen i tu hamu

U:   Antong rap mangido gogo ma hita sian Tuhan Debata:

H:   Ale Tuhan Debata sai pargogoi ma hami mangulahon na hombar tu patikMi. Amen

05.     Marende Huria No. 83: 1-2 (Na lao do birubiru i)

♪   Na lao do Birubiru i Mamorsan angka dosa. Ni nasa hajolmaon i Di benget ni rohana. Diporsan do sahitta i Di lehon do DiriNa i. Tu tangan ni pamunu Ditaoni

♪   do na bernit i. Ro et u tos et ug i Didok : Naeng porsanonku. (Jongjong)

♪   Ianggo Birubiru i , Ima alealengku. Na paluahon tondingki Disuru Debatangku. Didok mandok AnakNa i Sai topot ma pardosa i. Naung sun tinoruanku Balga tutu do rimashi. Alai tarbaen do mombun i Horhonon ni mudarMu

06.     Manopoti Dosa

U:   Hamu dongan sahaporseaon! Ro ma hita tu adopan ni Debata mardongan roha na polin, taokuhon ma angka dosanta tu Debata. Ale Tuhan Debata, huingot hami sadari on hapataran ni holongMu, i ma Jesus Kristus naung gantung di silang i. Ndang adong dosa diula Ibana, ndang hea adong angkal di bagasan pamanganNa. Alai boasa ingkon taononNa siak ni bagi dohot hamatean? I ma holong ni Debata na so halompoan, diusung Ibana angka sahitta jala angka pardangolanta diporsan. Asa patut do sai dohononta hata on:

H:   Ala ni pangalaosinta ibana tartullang, binahen ni hajahatonta ibana mabugang. Ampe tu ibana pinsangpinsang parhitean ni hasonanganta, jala binahen ni bugangna malum itahilala.

U:   Dilehon do patik i gabe siparorot mamboan hita tu dalan hasintongan, alai ndang taulahon. Dilehon nang hataNa gabe sulusulu dohot tungkotta, alai ndang tahangoluhon. Patut do didok si Jesaya:

H:   Luhut do hita lilu songon birubiru, ganup masitondong dalanna be.

U:   Ale Debatanami, na marasiroha jala na badia, asi ma rohaM di saluhut hami halak pardosa on. Sai unang pabali hami sian joloM ala ni dosanami i, ai ndang dihalomohon rohaM hamatean ni angka pardosa, alai hamubaon ni rohana do lomo ni rohaM, asa mangolu. Sesa ma saluhut hageduhonnami dohot pangalaosionnami marhitehite pangulunami na sasada i, AnakMu Tuhan Jesus Kristus. Sai pahot ma asi ni rohaM di hami marhitehite panindangion dohot hagogoon ni Tondi Parbadia asa tarapul situtu rohanami manjou Ho, asa pantun, tigor jala daulat hami marpangalaho, bahen hasangapon di GoarMu na badia i. Amen. 

H:   (Mangendehon Ende No. 86: 1+4 Silang na badia i) Satonga soara

♪  Silang na badia i Ho do lombulombungki. Maralohon dosa i dohot pandelean i. Di sude sitaonon i Ho ma lombulombungki.

♪  Dosa patundukkon au, ho ma mangondihon au. Ramun situtu do au, mudarMi mamuri au. Na pogos, dangol au on. Ho ma artangki tongtong.

U:   Bagabaga ni Debata taringot tu hasesaan ni angka dosanta: Ise be mangaluhon angka na pinillit ni Debata? Debata do na mamintori. Ise do na mandabu uhum hamagoan? Kristus Jesus do naung mate, alai ndada holan i, naung mulak mangolu do, jala di siamun ni Debata do Ibana mangondihon hita. Hasangapon ma di Debata na di ginjang!

H:   Amen

07.     Marende Huria No. 619: 1+3 (Di Golgota)

♪   Di Golgota husolsoli do sude dosangku na jorbut I. Ias au dibaen mudarNa I, puji Jesus i. Puji ma GoarNa puji mudarNa, paias rohangki puji Jesus i.

♪   MudarNa do namamuri au nunga ias songon hapas au. Unang ramun diramoti au, puji Jesus i. Puji ma goarNa ……

08.     Epistel

U:   Turpuk Epistel di Pesta sadari on, i ma na tarsurat di Psalm 39: 1-6, tajaha ma marsingkat soring: Ende sian si David siendehonon ni si

H:   Ninna rohangku do “Sai jagaonhu do angka pangalahongku maradophon dosa marhite sian dilangku, jagaonhu do huntam ni pamnaganhu saleleng di jolongku dope parjahat i

U:   Sai mangungu do ahu manghohomhohom, sai sip do ahu maradophon hauntungon, alai sai gunsang do ianggo parniahapanmi.

H:   Sai mohop do ateatengku dibagasan ahu, lam hupingkiri, lam marjimbur do api, gabe manghulingma dilangku.

U:   Sai pabotohon ma tu ahu, ale Jahowa ajalhu sogot dohot suhatsuhat ni ariaringku na otik i, asa huboto na gale do ahu hape

H:   Ida ma marsasantopap do angka ariaringku dibahen Ho, jala sobokhon na soada nama adamhu di joloM, Nang pe hot jongjong Sela .

U:   I ma sahatna: Martua do na tumangihon hata ni Debata, jala na umpeopsa. Amen

09.     Marende Huria No. 84: 1-2 (Aut na ginorga tu rohangku)

♪  Aut na ginorga tu rohangku, bohiM et u lao mate Ho. Aut na huingot o Tuhanku, tongtong pangkophopMi di au. Ai Ho do paluahon ahu, dosangku do pinorsanMi. Didaoni Ho parsahitonku, martua au binahen et . (Jongjong)

♪  Sai jalo ma’au ale Tuhanku. Baen upa ni na tinaonMi. Sai naeng ingoton ni rohangku, tung sasude na binaenMi. Humophop au pardosa godang, dibahen holong ni rohaM. Hinorhon ni tarbaen au sonang, laho mandapothon banuaM.

10.     Manghatindangkon Haporseaon (Agenda)

11.     Sunggul sunggul.

12.     Marende Huria No. 88: 1…..(Di surgo do alealenta)  P. Pelean

♪  Jesusku naung manobus ahu sai naeng haholonganku Ho. Tu dolok Golgata Ho laho Nionjar ni holongMu do. Hupuji nasa asiMi Alai gumodang holongMi. (Musik)

♪  Tarsolsolbagi do rohangku Paidaida dangolMi. Marningot sasude dosangku Ai i do na tinaonMi. Hupuji nasa asiMi Alai gumodang holongMi. (Musik)

♪  Jotjotna i husoadahon Ho, Sipangolu tondingkon. Mabiar lao mangkatindangkon Ho na mangkophop au tongon. Hupuji nasa asiMi Alai gumodang holongMi. (Musik)

13.     Jamita: Johannes 19:28-30

14.     Marende Huria No. 407: 1…. (Panotnoti ma silang) P. Pelean

♪   Panotnoti ma silang ni Tuhanta I nama. Morsan sude dosami, tinggangkon sude arsak ni rohami. Pasesahon sude dosami.So, jo,bereng I ! Panot-noti ma silang ni.  Tuhanta I, ngolumi, ngolungki sian i. (Musik)

♪   Tung beasa ditaon Ho, Tuhan, songon I. Dibagasan sude burjuMi ? Tung beasa sap mudar sude dagingMi, ai tigor do sude dalanMi. Nda I holongMi ? Mudarmi na use pasonangkon muse sasude na porsea disi. (Musik)

15.     Pamborhation tu ngolu siganup ari

U:   Huria ni Tuhanta, mulak ma hita sian bagasjoro on. Gorga ma tu roham jala uhirhon tu tondim sude na tinaon ni Tuhanta i. Ingot ma holongNa i naung paluahon hita sian dosa dohot hamatean. Ndada ala ni denggan ni parangenta manang jinou ni tua umbahen na dihophop hita, alai asa tung patar do diida portibi on holongNa i, ai didok do:

H:   Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana.

U:   Tiru ma parjahat na di siamunNa i. Parjahat na so malin na olo paubahon rohana jala na olo pasahathon daging dohot tondina tu Tuhanta i. Tangihon ma nda didok do: O Jesus, ingot ahu, ia dung sahat Ho tu harajaonmi! Sai taingot ma ganup ari pasahathon daging, tondinta, dohot sangkap ni rohanta et u Ibana, asa Ibana patiurhon.

H:   (Huria mangendehon Ende No. 691: 1 Hupasahat ma tu Jesus)

♪  Hupasahat ma tu Jesus saluhutna ngolungki, roha nang pambaenanku saluhutna tingkingki. Hupasahat ma tu Jesus saluhutna diringki, hupasahat ma tu Jesus saluhutna ngolungki.

16.     Tangiang Pelean +Ale Amanami+ Pasupasu (Agenda)

SELAMAT MERAYAKAN JUMAT AGUNG

ACARA PESTA PARNINGOTAN HAHEHEON NI TUHAN JESUS

HKBP SA-RESSORT TIGALINGGA

MINGGU, 27 MARET 2016

01.           Pamuhai

U:     Hamu dongan sahuria na marlas ni roha sadari on! Ndang tarbaen so marolopolop rohanta jala mariaia nang tondinta, ala naung MONANG TUHANTA MANALUHON HAMATEAN. Dibaheni, hupangido ma tu hamu saluhutna, rap tapangiar ma soaranta be mangolophon Raja Siparmonang i!

H:     Nunga monang Tuhanta! Talu Sibolis! Talu hamatean!

U:     Batu naung binolongkon ni angka pande bagas, i ma jadi batu parsuhi. Sian Jahowa do i masa, halongangan do i anggo di matanta.

H:     Nunga tarbondut hamatean; nunga soluk hamonangan! Jo hamatean, didia hamonanganmi? Jo hamatean, didia soropmi?

U:     Ari on do na jinadihon ni Jahowa, marolopolop jala marlas ni roha ma hita disi. Iale Jahowa, sai manumpak ma Ho! Iale Jahowa sai Ho ma mambahen manjadi! Pinasupasu ma na ro marhitehite goar ni Jahowa, hupasupasu hami ma hamu, angka na sian bagas ni Jahowa. Tambathon hamu ma angka pelean pesta i sahat ro di angka tanduk ni langgatan.

H:     Ho do Debatangku, jadi Ho do pujionku; ale Debatangku, sai Ho do patimbulonku.

U:     Mangasahon hamonangan na sian Tuhanta Jesus, pinasahat ma tabe hamonangan i tu hita: SELAMAT PASKAH ma di hita saluhutna! Antong, rap mangendehon ma hita: Pesta Paska hatuaon! Pesta Paska Haluaon sian hamatean i!

H:     (Mangendehon Ende No. 93: 1-3 Pesta Paska hatuaon)

♪  Pesta Paska hatuaon, Pesta Paska haluaon sian hamatean i sian hamatean i. Tuhan Jesus do pasuang hangoluan, hasonangan tu saluhut jolma i.

♪  Talu ho banuatoru ndang tarbahen tiopanmu Raja Siparngolu i, Raja Siparngolu i. Hamatean, hamagoan na so pola habiaran nunga talu i sude.

♪  Tuhan Jesus do na monang, Tuhan Jesus do pasuang, las ni roha  dame pe, las ni roha dame pe. Dongan golom ma hataNa na porsea di Ibana ndang tarbahen mago be.

U:      Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on. Amen, Haleluya! Di Tuhan Debatanta i do hatuaon dohot hasangapon dohot hamuliaon dohot hagogoon. Na pahehehon Tuhan Jesus, i do na pahehehon dohot hita sogot ala ni Tuhan Jesus.

H:      Mauliate ma di Tuhanta, Ibana do Debata na sun gogo, Debata na so marmula, jala na so marujung, Debata na so dung talu, na mangolu ro di salelenglelengna.

U:      Dibaheni, las ma rohanta, jala marolopolop nang tondinta, ala naung dipatulus Debata Ama i bagabaga haluaon na mandok:

H:      Ai ndang pasombuonmu diringku di banua toru jala ndang loasonmu na badiami marnida habusukon.

U:      Ai di Kristus do i diulahon Debata, di na pinahehena i Ibana sian na mate jala pinahundulna i tu siamunna di bagasan banua ginjang i, jala dipabangkit do Ibana, na mangatasi sasude, gabe ulu ni huria i.

H:      Sai pujionku do Jahowa sian nasa rohangku, pajojoronku ma sude halongangan angka na binahenMu.

H:      Beta ma hita sumomba Ibana Raja naung monang i, tapasahat ma angka ende psalmen, ende pujipujian dohot ende partondion, endehon hamu ma Debata jala dok hamu ma: HALELUYA!

H:     (Mangendehon) Haleluya……….Haleluya………Haleluya………..

U:     Martangiang ma hita: Ale Tuhan Debata ! Suru ma Tondi Parbadia tu rohanami, asa tarapul situtu rohanami marhitehite haheheon ni AnakMu, Tuhan Jesus Kristus, jala asa lam ganda haporseaonnami marhitehite pangkirimon na mangolu, asa tongtong huingot hami, na hehe do hami muse sian na mate songon Tuhan Jesus Kristus, Tuhannami, naung hehe sian na mate i. Amen.

02.           Koor

03.           Marende Huria No. 632: 1-2 (Nunga hehe Kristus)

♪   Nunga hehe Kristus marsihohot ma hamu. Lam sumurung hita diulaon ni Tuhanta. Lam sumurut hita di ulaon ni Tuhanta.  radot ma hita lao mangula Tuhanta. Radot ma hita mangula tu Tuhanta.

♪   Nunga hehe Kristus marlas roha ma hamu. Lam benget ma hita di sude parungkilonta. (2x). Jugul ma hita martangiang tu Tuhanta, Jugul ma hita martangiang tu Tuhanta. Amen

04.           Patik

U:     Patik ni Debata sihangoluhononta di Pesta Paskah I sadari on, i ma na tarsurat di Heber 5: 8-9, songonon ma didok: Ai atik pe Anak i Ibana, diguruhon do pangoloion marhite sian na tinaonanna i!

H:     Jala dung rimpas gabe sihorhon haluaon salelenglelengna do Ibana di sude na.

U:     I do sahatna. Antong rap mangido gogo ma hita tu Debata.

H:     Ale Tuhan Debata, sai pargogoi ma hami mangulahon na hombar tu patikMi. Amen

05.           Koor

06.           Marende Huria No. 95: 1+3 (Ngot ma ho dijou soara)

♪   Haleluya taendehon Nuaeng di ari haheheon Tuhanta Siparmonang i. Ai malua do Ibana Haruar sian tanomanna Na talu hamatean i. Sun ulaonNa i Dibaen Tuhanta i Haleluya. Naung sahat di Tuhanta i UpaNa na sumurung i. (Jongjong)

♪   Na so pola habiaran Ni hita on be hamatean Ai hita pe sai hehe do.  Molo burju taihuthon Tuhanta i di parungkilon Sai ingkon tu lambungNa ro. Diboan Jesus i Do hita on muse Tu lambungNa Parmonang i.  Sai saut ma i Binaen ni hagogoonMi.

07.           Manopoti Dosa

U:         Huria ni Tuhanta! Na jongjong do hita nuaeng di jolo ni Debata na badia i, dohot di jolo ni Tuhan Jesus Kristus Raja Siparmonang, nang dohot Tondi Parbadia, laho manopoti dosa na taula ganup ari. Taparhatutu do tung na jotjot hita manimbil sian dalan na sintong i. Ndang manahan hita mangaradoti patik ni Debata, jala ndang margogo manggotaphon parsaoran dohot sibolis, gabe ditogihon hita pasauthon sangkapna. Nang pat, nang mata, nang pamanganta sai dirajai sibolis ganup ari. Girgir do nian tondinta naeng manundalhon dosa, alai gale ia daging mangulahonsa.

……….martangiang na hohom manopoti dosa……….

U:         Ale Tuhan Debata, Amanami, Parasiroha na sumurung! Na pungu do hami di joloM martangiang tu Ho; ndada mangasahon hatigorannami, na mangasahon asi ni rohaM na godang i do. Sai asi ma rohaM mida sandok bangsonami, sesa ma dosanami saluhutna. Sai sungguli ma rohanami, asa muba roha dohot pangalahonami, ala ni Tuhan Jesus Kristus Tuhannami, Sipangolu hami.

H:         O Jesus Kristus, Anak ni Debata na gabe jolma, na mate jala naung hehe sian na mate. Huparhatopot hami do holom jotjot parnidaannami, gabe so huida hami tanganMu manogu hami di dalan na sintong i. Asi ma rohaM, sai marpangulahi ma roham mida hami jolma pardosa on.

U:         Tama do tiruonta songon pambahenan ni anak na mago i, na so marhasonangan ibana saleleng di parjalangan. Alai dipasuang ma rohana tu bagasan. Diingot ma hinatabo di bagas ni damang. Atik pe gok dosa ngoluna, pola ndang tama ibana goaron anak, alai hehe do ibana manopot amana i. Hita pe tama do pasuang roha, mamereng hinagodang ni parulanta na so tama. Sai magopu roha, jala sidangolon sambing do molo dao sian Ama i. Antong hehe ma hita manopot Ama Parasi roha i, Tapatedek ma sude hahurangan jala tatopoti ma sandok dosanta. Ai didok do: Molo tatopoti angka dosanta, haposan do Ibana jala bonar, manesa dosanta jala paiashon hita sian nasa hageduhon.

H:         (Mangendehon Ende No. 227: 5-6 Jesus ngolu ni) Satonga soara

♪  Raphon Ho do au mangalo dosa dohot hisaphi. Ai sumurut do pangago anggo Ho di lambungki.

♪  TondiMi sai tong paian di au on tinobusMi. Tung patau ma au manean pinarbagabagaMi.

U:         Baga-baga ni Debata taringot tu hasesaan ni dosanta: Adong do di hita sintua ni malim na songon i, na hundul di siamun ni habangsa ni hatongamon di banua ginjang. Dibahen i tarbahen Ibana do pangoluhon ro di ujungna angka na sandok ro tu Debata marhitehite Ibana; na mangolu do Ibana tongtong, asa diitangianghonnasida. Hasangapon ma di Debata na di ginjang!

H:         Amen 

08.           Koor

09.           Marende Huria No. 90: 2 (Sai marlas ni roha hita)

♪   Anggo utang ni dosangku Digarari Jesus i.  I do haporseaonku Di na tinaonNa i. Nunga tulus patik i Nunga mintop rimas i. Di na hehe i Ibana Ro di au hangoluanNa.

10.           Epistel

U:     Turpuk Epistel di Pesta Paskah I sadarion, i ma na tarsurat di Lukas 21:1-12  songonon ma didok:  Dungi mamereng ma Ibana, gabe diida ma angka na mora na mandabuhon silehonlehonna tubagasan poti parasian

H:     Alai diida ma boruboru namabalu sada, na pogos, namandabuhon dua

U:     Gabe didok Ibana ma; “Situtu do hatangkon tu hamu, gumodang do na nidabuhon ni namabalu na pogos an sian saluhutna i

H:     Ai Sasude nasida sian lobilobinasida be do didabuhon, alai ia parompuan an, sian pogosna i do di dabuhon sasude pineopna

U:     Dungi ditaringoti na deba ma joro i, naung di pajagar dohot batu angka na uli dohot silua ni halak, jala ninna Ibana ma

H:     Diida hamu pei sude na ro ma angka  angka arina, ndang tinggal disi dua batu martinditindi na so gargaronna

U:     Jadi di sungkun nasida ma  Ibana , ninna ma “Andigan ma masa i Guru; jala dia ma tandana, paboa laho songgopmai?”

 H:    Alai ninna Ibana ma “Jaga ma hamu, so tung lilu hamu. Ai lan do na ro sogot manoluk goarHu, angka na mandok:Ahu do, nunga dapot tingkina i, unang ma ihuthon hamu nasida

U:     Alai molo dibege hamu barita ni angka hamusuon dohot hagunturon, unang ma hamu tarsonggot; ai ndang tarbahen so songgop i jumolo. Alai ndang dope manigor dapot ajalna i:

H:     Laos didok ma tu nasida: “ Na hehe do sogot bangso maralohon banso, harajaon maralohon harajaon

U:    Masa ma lalo angka na bolon, angka sahit bala marluatluat nang haleon, tarida ma angka panonggoti ro di tanda na balga sian langit.

H:    Alai tagan so masa dope angka i, tangkupon jala lelelon nasida do hamu; pasahatonna do hamu tu angka parguruan dohot hurungan, gabe togihononna hamu tu jolo ni raja dohot panguhum humonghop goarHu

            U:    I ma sahatna: Martua do na tumangihon hata ni Debata jala na umpeopsa. Amen

11.           Koor

12.           Marende Huria No. 92: 1-2 (Puji ma na manaluhon)

♪   Puji ma na manaluhon Dosa hamatean i. Puji ma na pangoluhon Saluhut pardosa i. Jesus na dung mate i Las roham o huriaNa. Ala na mamillit ho, Jesus i mangolu do. (Jongjong)

♪   Tole hita mangendehon Halalas ni roha i. Dohot marolopolophon Sangap ni na monang i. Na tongtong mangolu i Tole hita mangendehon. Halalas ni roha i Di parngolu Jesus i.

13.           Manghatindangkon Haporseaon

14.           Koor

15.           Tingting

16.           Marende Huria No. 91: 1….. (Hatuaon do)  P. Pelean IA+IB

♪   Hatuaon do Las ni roha do Hangongot ni Tuhanta i. Mago do hita Ngot ma Tuhanta Las be,las be ma rohanta i.Mago do hita Ngot ma Tuhanta Las be, las be ma rohanta i. (Musik)

♪   Hatuaon do Las ni roha do Hangongot ni Tuhanta i. Monang do Jesus Talu sibolis Las be, las be ma rohanta i. Monang do Jesus Talu sibolis Las be, las be ma rohanta i. (Musik)

♪   Hatuaon do Las ni roha do Hangongot ni Tuhanta i. Mungkap do dalan Tu hangoluan Las be, las be ma rohanta i. Mungkap do dalan Tu hangoluan Las be, las be ma rohanta i.

17.           Jamita : Psalmen 118:1-2.14-28

18.           Marende Huria No. 94: 1…..(Ale Tondingku)  P. Pelean tu Kategorial Parompuan

♪   Ale tondingku naung hehe Tuhanmu Nunga ditaban do banuatoru. Las ma roham ai martua ma ho Rap dohot Jesus mangolu ma ho. Rap dohot Jesus mangolu ma ho. (Musik)

♪   Talu sibolis dibahen Tuhanta Nang hamatean nang dosa sudena. Sai dihalashon rohanta ma i PangoluonNa do hita sude PangoluonNa do hita sude. (Musik)

♪   Tahaburjuhon mangalo dosanta Jala tabaen Tuhan Jesus donganta. Pos ma rohanta di Tuhanta i PamonangonNa do hita sude PamonangonNa do hita sude. (Musik)

19.           Pamorhation tu ngolu siapari

U:     Hamu dongan sahuria! Magopo do haheheon ni Kristus i ianggo so parsidohot hita taruli di haluaon na pinatupaNa i. Magopo do haheheon ni Kristus ianggo so tahatindangkon naung tutu hehe Ibana. Alani, parsidohot ma hita diulaon pamaritaon ni barita las ni roha i. Alani, sai dok ma:

H:     Nunga hehe Kristus, Talu sibolis. Ibana do patujolo ni haheheonku sogot di ari parpudi, di na ro Tuhan na marhasangapon i.

U:     Haheheon ni Kristus i ma mangalehon gogo di hita laho manundalhon dosa. Dipahehe  rohanta asa ringgas patupa angka ulaon na denggan. Dipahehe rohanta asa lam ringgas mamongoti bagas joro  on, dohot manundalhon nasa dosa.

H:     Amen, saut ma tutu hata i di ahu.

20.           TANGIANG PELEAN + ALE AMANAMI+ PASUPASU (AGENDA)

ACARA PARTANGIANGAN BUHABUHA IJUK

PARNINGOTAN HAHEHEON NI TUHAN JESUS

HKBP SA-RESSORT TIGALINGGA

MINGGU, 27 MARET 2016

01.    Marende Huria No. 96: 1-2 Nunga talu hamatean.

♪   Nunga talu hamatean dibaen Tuhan Jesus i. Ai na hehe do Ibana songon na nidokNa i. Haleluya, haleluya nunga hehe Jesus i. Haleluya, haleluya nunga hehe Jesus i. (Musik)

♪   (Jongjong) Ia angka boruboru lao do tu tanoman i. Ndang disi be Tuhan Jesus nunga hehe sian i. Haleluya, haleluya….d.u.

02.    Votum/Introitus – Tangiang

U= Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on. Amen

       Nunga tarbondut hamatean….!

H=   Nunga soluk hamonangan

U=   Djo hamatean, di dia hamonanganmi?

H=   Djo hamatean, di dia soropmi?

U=   Alai dosa do sorop ni hamatean, jala patik i do gogo ni dosa i. Alai mauliate ma di Debata, na pamonang hita marhitehite Tuhanta Jesus Kristus, naung pinahehena sian na mate.

H=   (Huria mangendehon Reff ni Ende No. 96)

♪   Haleluya, haleluya nunga hehe Jesus i. Haleluya, haleluya nunga hehe Jesus i.

U=   Martangiang ma hita: Ale Tuhan Debata Amanami, marpungu do hami di buhabuha ijuk on mangkalashon ari hamonanganMu, ala naung dipahehe Ho Tuhan Jesus Kristus sian na mate, gabe ungkap pintu di hami tu hangoluan sisalelenglelengna. On pe sai asi ma roham sai pamonang ma hami maralohon angka hagogoon ni sibolis, asa dohot hami taruli di arta banuaginjang. Amen

03.    Pajojorhon barita taringot tu ari haheheon ni Tuhan Jesus

1. Mateus 28: 1-6                                3. 1 Korint 15: 14+17           5. Jes. 12 :1-6

2. 1 Korint 15: 3-5                              4. Ulaon 2: 23-24+32

04.    Marende Huria No. 94: 1-2 Ale tondingku naung hehe Tuhanmu.

♪   Ale tondingku naung hehe Tuhanmu, nunga ditaban ho banuatoru. Las ma roham ai martua ma ho, rap dohot Jesus mangolu ma ho. Rap dohot Jesus mangolu ma ho.

♪   Talu sibolis dibahen Tuhanta nang hamatean nang dosa sudena. Sai dihalashon rohanta ma i. PangoluonNa do hita sude, pangoluonNa do hita sude.

05.    Jamita => Jesaya 65:17-25

06.    Marende Huria No. 633: 1+4 Nunga hehe Krustus i.              (Papungu Pelean)

♪   Puji ma na  manaluhon dosa hamatean i. Puji ma na pangoluhon saluhut pardosa i. Jesus na dung mate i las roham o huriaNa. Ala na mamillit ho, Jesus i mangolu do.

♪   Tole hita mangendehon halalas ni roha i. Dohot marolopolophon sangap ni na monang i. Na tongtong mangolu i tole hita mangendehon. Halalas ni roha i di parngolu Jesus i.

07.    Tangiang Panutup

ACARA TELOR PASKAH DIATUR TERSENDIRI

ACARA PARTANGIANGAN BUHABUHA IJUK

PARNINGOTAN HAHEHEON NI TUHAN JESUS

HKBP SA-RESSORT  TIGALINGGA

MINGGU, 27 MARET 2016

01.    Marende Huria No. 96: 1-2 Nunga talu hamatean.

♪   Nunga talu hamatean dibaen Tuhan Jesus i. Ai na hehe do Ibana songon na nidokNa i. Haleluya, haleluya nunga hehe Jesus i. Haleluya, haleluya nunga hehe Jesus i. (Musik)

♪   (Jongjong) Ia angka boruboru lao do tu tanoman i. Ndang disi be Tuhan Jesus nunga hehe sian i. Haleluya, haleluya….d.u.

02.    Votum/Introitus – Tangiang

U= Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on. Amen

       Nunga tarbondut hamatean….!

H=   Nunga soluk hamonangan

U=   Djo hamatean, di dia hamonanganmi?

H=   Djo hamatean, di dia soropmi?

U=   Alai dosa do sorop ni hamatean, jala patik i do gogo ni dosa i. Alai mauliate ma di Debata, na pamonang hita marhitehite Tuhanta Jesus Kristus, naung pinahehena sian na mate.

H=   (Huria mangendehon Reff ni Ende No. 96)

♪   Haleluya, haleluya nunga hehe Jesus i. Haleluya, haleluya nunga hehe Jesus i.

U=   Martangiang ma hita: Ale Tuhan Debata Amanami, marpungu do hami di buhabuha ijuk on mangkalashon ari hamonanganMu, ala naung dipahehe Ho Tuhan Jesus Kristus sian na mate, gabe ungkap pintu di hami tu hangoluan sisalelenglelengna. On pe sai asi ma roham sai pamonang ma hami maralohon angka hagogoon ni sibolis, asa dohot hami taruli di arta banuaginjang. Amen

03.    Pajojorhon barita taringot tu ari haheheon ni Tuhan Jesus

1. Mateus 28: 1-6                                3. 1 Korint 15: 14+17           5. Jes. 12 : 1-6

2. 1 Korint 15: 3-5                              4. Ulaon 2: 23-24+32

04.    Marende Huria No. 94: 1-2 Ale tondingku naung hehe Tuhanmu.

♪   Ale tondingku naung hehe Tuhanmu, nunga ditaban ho banuatoru. Las ma roham ai martua ma ho, rap dohot Jesus mangolu ma ho. Rap dohot Jesus mangolu ma ho.

♪   Talu sibolis dibahen Tuhanta nang hamatean nang dosa sudena. Sai dihalashon rohanta ma i. PangoluonNa do hita sude, pangoluonNa do hita sude.

05.    Jamita => ROM. 6 : 3-11

06.    Marende Huria No. 633: 1+4 Nunga hehe Krustus i.              (Papungu Pelean)

♪   Puji ma na  manaluhon dosa hamatean i. Puji ma na pangoluhon saluhut pardosa i. Jesus na dung mate i las roham o huriaNa. Ala na mamillit ho, Jesus i mangolu do.

♪   Tole hita mangendehon halalas ni roha i. Dohot marolopolophon sangap ni na monang i. Na tongtong mangolu i tole hita mangendehon. Halalas ni roha i di parngolu Jesus i.

07.    Tangiang Panutup

ACARA TELOR PASKAH DIATUR TERSENDIRI

ACARA PASSION BORNGIN PADUAHON

HKBP SA-RESSORT TIGALINGGA

01.     Patujolo       

U: Salam Passion ma di hita sude. Passion na paduahon ma nuaeng na tapatupa di tonga-tonga ni huria on. Dihirim rohanta do marhite acara on, lam uhir tu tondinta na tinaon ni Tuhanta i laho manghophop hita pardosa on, asa malua hita sian uhum dohot hamatean. Denggan do nang Passion on tamemehon di keluarganta be, asa anggiat parsidohot angka ianakkonta manangihon dohot mangauhon angka na tinaon ni Jesus i. Alani, taparade ma rohanta, pingkiranta paihutihut acara on. Marende ma hita! 

S:  (Mangendehon Ende No. 88: 1-2 Di surgo do alealenta)

♪    Jesusku naung manobus ahu sai naeng haholonganku Ho. Tu dolok Golgata Ho laho nionjar ni holongMu do. Hupuji nasa asiMi alai gumodang holongMi.

♪    Tarsolsol bagi do rohangku paidaida dangolMi. Marningot sasude dosangku ai i do na tinaonMi. Hupuji nasa asiMi alai gumodang holongMi.

U: Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on. Amen. Ngot ma  ho ale tondingku, unang sai modom ho. Puji ma Ibana Debata sitompa ho. Ibana do paluahon hosam sian hamagoan, Ibana martumpalhon tu ho denggan basa dohot asi ni roha.

H: Pujiongku ma Ibana na paluahon tondingku sian hamagoan, pasangaponku ma Ibana na mangalehon hangoluan sisalelenglelengna di ahu.

U: Ida ma godang ni holong ni Debata na nilehonNa tu hita, atik pe sai jotjot tatadingkon dalan na sintong i, alai sai marpangulahi do rohaNa. Ai godang pe dosanta, gumodang do holongNa. Sada do diparsinta Debata sian hita, naeng mulak birubiru na lilu i tu dalan na sintong.

H: Pujiongku ma Ibana na paluahon tondingku sian hamagoan, pasangaponku ma Ibana na mangalehon hangoluan sisalelenglelengna di ahu.

U: Sai paeleng ma pinggolMu tu ahu, ale Debatangku. Ai Ho do partanobatoanku hian dohot pangondinganku, jala ala ni goarMu sai iringiringonMu jala toguonmu ahu di dalan na sintong i. Tu Ho do ahu marhaposan, sai unang ma paurak ahu saleleng ni lelengna, sai palua ma ahu marhitehite hatigoranMu! HOSIANA

H: (Mangendehon Hosiana)

     Hosiana……..Hosiana…….Hosiana……..

U: Martangiang ma hita: Ale Amanami na di banua ginjang! Disuru Ho do AnakMu Tuhan Jesus Kristus tu portibi on, asa disegai angka ulaon ni sibolis i. Sai padungo ma hami marhitehite TondiM na badia i, asa unang tarpedem hami di bagasan dosa, alai asa monang hami sahat ro di ujung, jala asa mardame hami saleleng di tano on, paima sahat hami tu hangoluan na so ra suda marhitehite AnakMu, Tuhan Jesus Kristus, Tuhannami. Amen.

02.     Marende Huria No. 673 : 1+4 (Adong do sada Mual i)

♪   Adong do sada mual I na sian Tuhan I, Durus sian bugangNa I di hau parsilang I, Di hau parsilang I, di hau parsilang I, Durus sian bugangNa I di hau parsilang i.

♪   Dung na hutatap Tuhan I manaon na bernit I, Sai pujionku holongMi, saleleng ngolungki, Saleleng ngolungki, saleleng ngolungki, Sai pujionku holongMi, saleleng ngolungki.

03.     Manjaha Turpuk

U: Tabege ma hata ni Debata na tarsurat di 1 Petrus 2: 22-25 taringot tu pangkophopon ni Debata di hita: "Ndang adong dosa diula Ibana; ndang jumpang angkal di bagasan pamanganna."Ndang manginsahi Ibana, di na hona insak, ndang mangasupi, di na manaon na porsuk; alai dipasahat do tu Panguhum sitigor roha i.

H: Diporsan Ibana do dosanta di bagasan dagingNa tu hau i, asa malua hita sian dosa, gabe mangolu di hatigoran i: "Hinorhon ni bugangna i do gabe malum hamu."

U: Ai songon birubiru na lilu do hamu najolo; alai nunga didompakkon hamu nuaeng Parmahan i, na manganahon tondimuna. Ido sahatna. Martua ma na tumangihon hata ni Debata, jala na umpeopsa. Amen

04.     Marende Huria No. 169: 1 (Ho sipangolu au)

♪  Ho Sipangolu au, sai topot ma au on. Sai unang mandaodao. Ho sian rohangkon. Ro Sipangolu ro tibu, baen ma au anakMu tutu. Dohot mudarMi buri au ias songon hapas ma au. Ias tutu, ias tutu, dohot mudarMi buri au. Ias songon hapas ma au.

05.     Sipahusorhusoron sian sitaonon ni Tuhan Jesus, domu tu pardalanan ni ngolunta.

        

BAGIAN I=> NDANG MANSADI IBANA MARTANGIANG

U: Dung i sahat ma Jesus rap dohot siseanNa tu porlak sada na margoar Getsemane. Jadi didok ma tu angka sisean i: Hundul ma hamu jolo dison, saleleng disan Ahu martangiang. Jala didok ma tu nasida: Mansai marsak situtu do rohangku, hira na mate do. Dison ma hamu, dungo rap dohot Ahu! Jala DI PARUNGKILONNA I, LAM DIGOGO MA MARTANGIANG, JADI SONGON MUDAR NA HIMPAL DO MADEKDEK HODOKNA I TU TANO. Dung i mulak ma Ibana tu angka siseanna, jala tarpodom do nasida didapot, jadi didok ma tu si Petrus: Ndang margogo hamu hape dungo rap dohot Ahu nanggo sangombas? Dungo ma hamu jala martangiang, asa unang hamu bongot tu pangunjunan, ai na girgir do nian tondi i, alai gale do ia daging!

     Andorang mardaging jolma Tuhan Jesus di portibi on, tung diae Ibana do sude songon na niae ni hita jolma. Male do Ibana, mauas, tangis, jala marsak. Gariada hira mudar na himpal nama manetek hodokna uju martangiang ibana di Getsemane. Nunga sonson di joloNa hamatean i. Tiruan do on di hita, asa unang putus parsaoranta dohot Ama i. Unang lemba hita di tangiang. Ai ragam do angka na masa na taadopi di portibi on. Ro do arsak, sahit, hasusaan dohot hamatean. Molo langgus rohanta di tangiang, talu ma hita. I do umbahen didok Tuhan Jesus nangkin tu angka sisean i: Dungo ma hamu jala martangiang, asa unang hamu bongot tu pangunjunan. Uju maol dalan tabolus, gok mara nang ngolunta, ingkon lam marsitutu jala manggogo do hita martangiang. Ai tangiang do dalanta asa taruli hita digogo na sian Debata. Ingkon ingotonta do, gari Tuhan Jesus ndang hea mansadi martangiang, nda ingkon lam sumurung ma hita on?

H: Ale Tuhan, sai padungo ahu martangiang tu Ho, unang talu ahu dibahen sibolis i. (mangendehon BE. No. 487: 1-2)

♪   Tung halak na margogo si partangiang i. Dokdok pe si taonnon, ndang olo talu i. Pos situtu roha na di Debata na i. Tuhan na manaluhon sude pangalo i.

♪   Nang hirahira mogap dibaen sitaonon i, Marsinggang do Ibana managam Tuhan i. Dung jumpang pe tingkina sumurut arsak i, Tarapul ma rohana dibaen Tuhanna i.

BAGIAN II=> NDANG DIBALOS NA JAT ALO NI NA JAT

U: Dung tartangkup Tuhan Jesus di Getsemane, diboan ma Ibana tu jolo ni panguhum, dohot Sintua ni Jahudi. Saleleng di pardalanan manuju tu jolo ni angka panguhum i, ndang mansadi na torop i pauruuruhon. Dung sahat tu jolo ni si Latus, didokkon ma linsingan. Dung i dipungka na deba sian nasida manijuri Ibana, dibulang ma matana, dipastapi ma bohina huhut mandok tu Ibana: Manurirangi ma Ho! Nang angka naposo manahopi Ibana, laho mangalombuti. Jadi didandani angka soldadu ma sungsang duri bahen tumpal, diampehon ma i tu uluna; baju dapdap ma dialithon tu dagingna. Nang dung gantung Tuhanta I di silang i, ro dope insakinsak sian angka pamolus, diupirhon be ma ulunasida huhut dipandok: Pe Ho, na mangalohai bagas joro i jala na pajongjongkonsa di bagasan tolu ari! Palua dirim jala mijur ma Ho sian hau na pinarsilang i!

Di sude angka hata reherehe, insakinsak, pastappastap na binahen ni na torop ndang dialo Ibana. Nian aut lomo rohaNa boi do padirionNa lobi sian sampuludua loksa surusuruan mangalo angka natorop i. Alai ndang dibaloshon na jat alo ni na jat. Gariada  songon birubiru do ibana na tinogu tu pamotongan, jala songon anak ni birubiru na hohom maradophon jolma sigusting ibana, tung na so dibungka do pamanganna. On do hataNa sian silang i: Ale Amang! MARPAMUATI MA ROHAM MIDA NASIDA, AI NDANG DIBOTO NASIDA NA BINAHENNASIDA I. Tama do tiruonta na binahen ni Tuhan i di ngolunta, asa unang mahatophu hita mamaloshon angka hahurangan na binahen ni dongan. Jala unang mamaolhu hita nang manesa sala ni donganta. Ingkon berjuang do hita pasuathon hata ni surat i na mandok: ringkoti hamu ma na denggan di jolo ni halak saluhutna! Molo tarbahen, intap na tarpatupa hamu, tiop hamu ma dame maradophon halak saluhutna!

H: Ale Tuhan, sai palambas ma rohangku dompak angka dongan i, asa tung ringgas rohangku lao manesa dosana na tu au! (Mrende BE No. 481:2-3)

♪   Tuhanta Jesus tiruanmu do. Na holong roha di au nang di ho, Ai diseahon do diriNa i, Singkatta lao tu hamatean i, Ndang na dialang holong roha i, Ai naeng dihita hangoluan i.

♪   Tatiru holong ni rohaNa i, pinatuduhaon ni Tuhanta i, Tahaholongi ma donganta i, ai ruas ni Tuhanta do nang i ! Mardame ma, marsijalangan ma; Tatuju ma solhot tu debata !

BAGIAN III=> DIPASAHAT TONDINA TU AMA NA DI SURGO I

U: Mareak pungkul sampuludua, songgop ma na holom tu sandok tano i sahat ro di pungkul tolu. Ai mangkolom ma mata ni ari i. Jadi maribak ma hirehire na di bagas joro i, bola dua. Dung i marsoara na gogo ma Jesus, ninna ma: AMANG! TU BAGASAN TANGANMU MA HUPASAHAT TONDINGKU! JADI DUNG DIDOK I, TOS MA HOSANA. On do hata na parpudi haruar sian pamangan ni Tuhan Jesus, dungi tos ma hosaNa. Asa sude ngoluNa sian Ama I do, marhitehite Ama I do, jala laho tu Ama I do. Atik pe songon na ditadingkon Ama I Ibana sangombas di parungkilonNa i, alai tong do Damang Ibana, tong do AnakNa Jesus, alani i do umbahen tu bagasan tanganNa dipasahat tondiNa.

     Naeng songon i do hita, sai unang lupa hita pasahathon daging, tondi dohot rohanta tu Ama na di surgo i. Ai ndang taboto manang sadihari hita borhat manadingkon hasiangan on. Molo tongtong dungo hita disi, dohononNa ma tu hita sogot di ari parpudi i:

H: Ro ma hamu, angka na pinasupasu ni Damang, tean hamu ma harajaon i, na pinature di hamu sian haoojak ni tano on. Nunga huparade panganon pesta i, nunga hupotong angka horbo dohot lombu, nunga rade saluhutna. Ipe, ro ma hamu!           

06.     Marende Huria No. 176: 2-3 (Na mungkap do surgo)

♪  Dosam do tinaonNa di Golgota i. Disi dipasae do sude utangMi 2x.

♪  Antong o tondingku tu Jesus ma ro. Ai las do rohaNa manjangkon nang ho 2x.

07.     Jamita=> LUKAS 23 : 43

“SITUTU DO HATANGHON TU HO : SADARION DO RAP DOHOT AHU DI PARADEISO”

08.     Marende Huria No. 449: 1+4 (Sai solhot tu silangMi)

♪  Sai solhot tu silangMi, Jesus ingananku. Mual na mabaor disi, i ma inumonku. SilangMi, Tuhanki i ma pujionku. Paima sogot sahat au, i endehononku.

♪  Laos maniop silangMi sai paimaonku. GokkonMi tu surgo i, tu siteanonku. SilangMi…….

09.     Martangiang sahalak sian Ruas

10.     Marende Huria No. 86: 1+3 (Silang na badia i)  / P. PELEAN

♪   Silang na badia i Ho do lombulombungki. Maralohon dosa i dohot pandelean i. Di sude sitaonon i Ho ma lombulombungki.

♪   Ro do au nuaeng tu ho, sai palambas ma rohaM. Nunga pola mate Ho, ala asi ni rohaM. Jangkon au na dangol on, sai ulosi tondingkon.

11.     Tangiang Panutup:  Rap mandok tangiang: Ale Amanami na di banuaginjang…d.u.

ACARA PASSION BORNGIN PARJOLO

HKBP SA-RESSORT  TIGALINGGA

TAHUN 2016

01.     Patujolo       

U: Selamat Passion ma di hita sude. Passion na parjolo ma nuaeng na tapatupa di tonga-tonga ni huria on. Passion na marlapatan ma i: “Sitaonon”, manang siak ni bagi na ingkon taonon ni Jesus. Hita hian do na marsitaonon ala ni angka dosanta be, jala ingkon bolong sambing nama ngolunta hian ala pangontak ni dosa ima haamaatean i. Hape gabe pampe tu ibana do saluhutna pinsang-pinsang dohot partinaonanta i. Ido na taingot jala na naeng hangoluhononta mardongan mauliate di bagasan borngin on. Alani, taparade ma rohanta, pingkiranta paihutihut acara on. Marende ma hita! 

S:  (Mangendehon Ende No. 179: 1-3 Adong do sada mual i)

♪    Adong do sada mual i, di na mardosa i. Mansai denggan do mual i pasonang rohangki.

♪    Aek mual na badia i, ima di Jesus i. Disesa do tihasta i, dibuat arsak i. (Musik)

♪    (Jongjong) Ai mudar ni Tuhanta i Do mual i sintong. Durus di Golgata do i Mangkophop hita on

U: Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on. Amen. * Sai paeleng ma pinggolmu, ale Jahowa, alusi ahu, * ai na dangol jala na pogos do ahu. Sai * ramoti ma rohangku, ai hasian do ahu; sai urupi ma naposom, na marhaposan tu Ho, ale Debatangku.

H: Asi ma roham di ahu, ale Tuhan, ai sai tu Ho do ahu joujou manipat ari. Sai palas ma roha ni naposomon, ai * Ho do, ale Tuhan, dihalungunhon rohangku.

U: Ai anggo Ho, ale Tuhan, pardengganbasa jala * marpamuati roham, jala godang situtu do asi ni roham di sude angka na manjou Ho. Sai tangi ma, ale Jahowa, tangiangkon jala parateatehon soara ni anggukkon.

H: Di ari hagogotanki Ho do hujou, ai sai alusanmu do ahu. Ndang adong tudoshon Ho di tongatonga ni angka Debata, ale Tuhan, jala ndang adong tudoshon angka pambahenanmi

U: Ai na godang situtu do asi ni roham di ahu, jala * dipalua Ho do tondingku sian banua toru apala partoru. Hosiana

H: (Mangendehon Hosiana)

     Hosiana……..Hosiana…….Hosiana……..

U: Martangiang ma hita: Ale Tuhan Debata,  na badia jala na bonar. Parasi jala partalup ni roha jala na basar do Ho. Sai marpangulahi ma roham mida hami. Dibahen I sai sesa ma sude dosanami. Ndang adong na hupangasahon hami dungkon asi ni roham, hatigoran na pinatupa ni AnakMu do na hupangasahon hami  tu joloM. Dibahen I pasonang jala apuli ma hami angka na hinongkop ni Tuhan Jesus kristus Tuhannami. Amen.

02.     Marende Huria No. 180 : 1-2 (Ro tu Jesus Ho na loja)

♪   Ro tu Jesus ho na loja Na maheu i. Lam lumbang do di lambungNa Rohami.

♪   Bereng di hau pinarsilang Daon ni sahitmi. Tuhanmi na hona uhum Singkatmi

03.     Manjaha ayat Passion: Liturgi 1 (No1-7)

04.     Marende Huria No.88. 1 (Jesusku Naung Manobus au)

♪   Jesusku naung manobus ahu sai naeng haholonganku Ho. Tu dolok Golgata Ho laho Nionjar ni holongMu do. Hupuji nasa asiMi Alai gumodang holongMi

05.     Manjaha Ayat Passion: Liturgi 2 (No.  8-14)

06.     Marende Huria No. 82: 1 (O Jesusku Tu BugangMu)

♪   O Jesusku, tu bugangMu, ro marsomba rohangkon. Sai tarpuji, sai tarpuji, na pamalum tondingkon.

07.     Manjaha Ayat Passion : Liturgi 3 (No. 15-21)

08.     Marende Huria No. 417 : 1

♪  Rade situtuhaluaon, na naeng tangkuponmu antong. Rade nang di ho hatuaon, si halas ho non mu tongtong. Bernit do di taon Tuhanmu pasehon dosam sasude. Tung unang paujat Ibana, Sai jangkon pangkophopNa i.

09.     Renungan Passion: Mateus 26: 39

10.     Marende Huria No. 416: 2-3 (Tu Jolom O Debatangku)

♪  Husolsoli do rohangku, na gok dosa I tongtong, Ai godang ariaringku na hubahen ambolong.

♪  Sai jotjot do hutandingkon dalanMi na tigor I, Kristen au, hape hutondong dalan hamagoan i.

11.     Martangiang sahalak sian Ruas

12.     Marende Huria No. 415: 1+3 (Ai Naeng Malua Ho Sian Dosam) / P. Pelean

♪   Ai naeng malua ho sian dosam ? Gogo mudar ni Tuhan ta i. Tangkup. Ma I, asa sonang roham, na gogo tutu mudar i. Mudar I tuk Paluahon. Ho, Mudar I, mudar I, tung na gogo tung gogo do I, holan mudar ni Jesus i.

♪   Nunga magigi ho di bangkomi ? gogo mudar ni Tuhanta i. Sai hamonangan sijaloonmi hinorhon ni mudarna i. Mudar……………

13.     Tangiang Panutup:  Rap mandok tangiang: Ale Amanami na di banuaginjang…d.u.

SELAMAT PASSION