ACARA PARNINGOTAN HANANAEK NI TUHAN JESUS

PARTURE NI PARNINGOTAN

HANANAEK NI TUHAN JESUS

                  DI HKBP   RESORT  TIGALINGGA

====================================

KRISTUS MANGGOHI SALUHUTNA

KAMIS 05 MEI 2016

 

1.     Joujou manghalashon Hananaek ni Tuhan Jesus!

L:     Hamuna angka dongan sahaporseaon! Na marpungu do hita sadari on manghalashon parningotan hananaek ni Tuhan Jesus tu banua ginjang. Na manaek do Ibana laho hundul di siamun ni Debata AmaNa paradehon inganan di hita halak na porsea. Na mulak do Tuhanta i tu haroroanNa hian dung dipasidung ulaonNa di portibi on patupahon haluaon di hita halak na porsea. Na ro do Ibana muse mangalap hita laho manean hangoluan na manongtong na pinaradeNa i. Antong! Tapahibul ma rohanta marsaor dohot Ibana. Tasombahon ma ende pujipujianta marhite na taendehon: “Ingoton ma sadari on parnaek ni Tuhan Jesus......”!

      02. Marende No. 97: 1 + 3 “Patimbul be ma sangap i” 

1. Ingoton ma sadari on parnaek ni Tuhan Jesus. Tu habangsaNa na tongtong na so tarbaen be meret. Tasomba ma Tuhanta i, naung mulak tu AmaNa i, Tapuji ma Ibana. ~~~~ Jongjong ma hita~~~~

3.  Ianggo las roham tutu di Jesus i Tuhanta. Pauba ma roham burju ihuthon ma Ibana. Oloi hataNa sasude, sai tiru pambaenanNa pe. Saleleng ho mangolu.

03.    Votum – Introitus - Tangiang:

 (L=Liturgis; H=Huria; A:Ama; I; Ina; RM; Remaja Naposo; S=Sude)

         L:   Marhitehite goar ni Debata Ama, anakNa Tuhan Jesus Kristus dohot Tondi Parbadia na manompa langit dohot tano on. Amen. Songon on do didok Tuhan i: Bahenongku do sogot na monang i rap dohot Ahu hundul di habangsangKi, songon Ahu na monang i jala hundul rap dohot Damang di habangsaNa i.

         H:   Asa anggo Tuhan i, dung manghatai Ibana dohot nasida, tarhinsat ma tu banua ginjang, laho hundul tu siamun ni Debata. Alai laho do anggo nasida manjamitahon barita na uli tu ganup luat; jala diurupi Tuhan i ma nasida, dipahot ma jamitanasida marhitehite tanda angka na mangihut i.

         L:   Jadi ditogihon Ibana ma nasida ruar tungkan Betania, dung i dipaherbang ma tanganna mamasumasu nasida. Jadi di na mamasumasu nasida Ibana, sirang ma Ibana sian nasida jala tarhindat tu ginjang.

         S:   Dung i disomba nasida ma Ibana jala mulak tu huta Jerusalem, marlas ni roha situtu. Jadi tongtong ma nasida di joro i mamujimuji Debata.

         L:   Songon halak na porsea hita di hananaek ni Tuhan Jesus tu banua ginjang mangondihon hita jolma pardosa. Ingkon hatindanghononta do hataNa na mandok: “Sai patimbul ma diriM ale Debata tu atas ni langit; hamuliaonMu tu sandok tano on” (Psalm 57: 6). Antong! Taendehon ma: Haleluya.

         S:     Mangendehon: Haleluya – Haleluya – Haleluya.

         L:   Martangiang ma hita: Ale Tuhan Debata! Huingot hami do sadari on hananaek ni anakMu Tuhan Jesus Kristus tu lambungMu di banua ginjang i. Nuaeng pe, hupangido hami ma tu Ho: Suru ma Tondi parbadia tu rohanami, asa Ibana tongtong mangarajai rohanami. Asa tung tarapul situtu rohanami marhite-hite hananaek ni AnakMu Tuhan Jesus Kristus tu hasangaponMi.

H:   Sai paganda ma haporseaonnami asa lam marpanghirimon na mangolu hami di anakMu Tuhan Jesus Kristus. Asa huparrohahon hami roha banua ginjang marhite Ibana. Tangihon jala olo i ma pangidoannami na husombahon hami tu Ho, saleleng hami mangolu. 

L:   Sai buha i ma rohanami, jala patinggil sipareonnami manangihon parsuruonMu tu hami mamaritahon HataM. Asa lam huboto hami mangulahon lomo ni rohaM.

H:  Lehon ma tu hami Parhalado na burju mangulahon hataM, pargogoi ma nasida, asa tongtong di radoti ulaon na pinasahatMi tu nasida jala asa marsahala situtu mangalo bisuk ni sibolis i, asa tung rarat harajaonMu di portibi on, paima sude angka musuM peak di toru ni patMu.  

S:   Ale Tuhan Jesus! Pargogoi ma hami mamuji dohot mangoloi Ho dipardalanan ni ngolunami, ai Ho do na mangolu dohot na mang-gomgomi rap dohot Ama i dohot Tondi Parbadia. Asa tarjalo hami pasupasuM na sumurung i, paima sahat hami tu lambungMu di banua ginjang i. Amen. ~~~~Hundul ma hita~~~~

        04. KOOR:

       05. Marende No. 341: 5 - 6  “Tibu ma jumpang tingki ni”

     5. Urupi Jesus au disi, Hinorhon ni mudarMu, Asa tarsurat goarhi di sipangoluonMu. Na pos do rohangki disi, Ai nunga talu musu i, margarar pe utangku.

      6. Dibahen i ondihon au di ari paruhuman. Sai Ho ma paluahon au Rap dohot angka dongan. Ho ma pujionnami be, dung sahat hami sasude di surgo ni ungkapMu.

       06.   Patik: Galatia 2: 20

      L:     Hamu angka dongan! Tatangihon jala tahangoluhon ma Patik ni Debata di Pesta Parningotan ari hananaek ni Tuhanta Jesus Kristus sadari on, i ma na tarsurat di Galatia 2: 20, rap ma hita mandok:

H:    Ndada ahu be na mangolu i nuaeng; Kristus do mangolu dibagasan ahu. Ia mangolu pe ahu nuaeng dibagasan daging, mangolu marhitehite, haporseaon di Anak ni Debata, na manghaholongi ahu jala na mangalehon diriNa humonghop ahu.

L:     Antong! rap mangido gogo ma hita tu Tuhan Debata laho mangulahon patikNa i.

H:    Ale Tuhan Debata sai pargogoi ma hami mangulahon na hombar tu patikMi. Amen..

      07.      KOOR:

       08.   Marende No. 424:1- 2 “Soara ni Tondi”

1.     Soara ni Tondi ni Tuhanta i. Jotjot dilaosi ditulak ho i. Sai tanda jeamu, pauba roham, dapothon Tuhanmu sisesa dosam.

                                    ~~~~Jongjong ma hita saluhutna~~~~

2.     Marunduk ni roha topoti sude, Pambaenmu na torbang jengkelmu sude, Pasahat tu Jesus sandok dirimi. Sai tong pasunggulhon panghophopNa i.

       09.   Tangiang manopoti Dosa dohot Manjangkon BagabagaNa:

        L:    Ale Tuhan Debata Amanami na di banua ginjang! Ho do na patupahon hasesaan ni dosa di hami halak na dangol on marhite Anak haholongan ni rohaM naung manaek tu banua ginjang mangondihon hami jolma pardosa.

H:    Asi ma rohaM di hami, angka na mangarsakhon dosanami. Nuaeng pe nunga ro hami tu adopanMu. Sai rap dohot Ho ma hami, jala hami ma di Ho.  

S:     Molo ro hami nuaeng tu adopanMu Tuhan! Tangihon ma pangi-doannami, sai patinggil ma pinggolMu tumangihon soara dohot hoihoinami. Nunga marroha pamuation Ho mida hami jolma pardosa on. Tangihon ma tangiangnami na tedek di adopanMu na badia i.

L:     Hamuna angka dongan na hinaholongan ni Tuhan Jesus naung manaek tu banua ginjang i: Tajangkon jala tahangoluhon ma baga-baga ni Debata taringot tu hasesaan ni dosanta: “Molo tung adong manang ise na mardosa, adong do pangondianta di Ama i, i ma Tuhanta Jesus Kristus na tigor roha i. Jala Ibana do Pardengganan taringot tu dosanta, alai ndada holan taringot tu dosanta, dohot do taringot tu dosa ni portibi on”. Hasangapon ma di Debata na di ginjang.

       H:    Amen. ~~~~Hundul ma hita saluhutna~~~~

       10.   Marende No. 101: 1 - 2 “O Debata mansai balga”

1.     Taiti gogo ihut tu Ho, palungun rohanami. Tu surgo i, ingananMi, o Jesus Tuhannami.

2.     Togu tongtong ma hami on di dalanMi tu surgo. Anggo so i oloanMi sai saut do hami mago.

11.     KOOR:

      12.    Epistel: Psalmen  47:2-10

         L:    Hamuna angka dongan, tajaha jala tatangihon ma Hata ni Debata turpuk Epistel di Pesta Parningotan hananaek ni Tuhan Jesus sadari on, i ma na tarsurat Psalmen 47:2-10, na mandok: Martopaptopap tangan ma sude hamu angka bangso! Puji hamu ma Debata mardongan soara olopolop!

A:    Ai Jahowa do na sun timbul, na songkal, Raja bolon do Ibana gumomgom liat portibion

I:    Papatuonna do angka bangso tu hita dohot angka marga tu toruni patta

H:   Ibana do mamillit di hita pargolatanta hatimbulon ni si Jakkob, nahinaholongan na i Sela!

L:   On pe, ale Debata ni Israel, sai pasintong ma hatami naung pinorbagabagam tu naposom si Daud, damang i.

R/M: Manaek do Debata mardongan parolopolopon, Jahowa mardongan soara ni sarune

H:   Sai Endehon hamu ma Debata! Sai endehon hamu ma Rajanta i! Endehon ma tutu!

L:    Ai Debata do Raja ni liat portibion endehon hamu ma ende sipodaon

H:   Debata do mangarajai angka parbegu, hundul do Debata di atas habangsa habadiaonNa i

R/M  :Marpungu do angka na sangap ni angka bangso tu bangso ni  Debata ni si Abraham , ai Debata do nampuna  angka lombulombu ni tano on, timbul situtu do Debata

   L:   I ma sahatna. Martua ma  angka na tumangihon Hata ni Debata, Jala na umpeopsa .

  H:    Amen

      13.      KOOR:

       14.   Marende No. 131: 1 + 3 “Batang aek usehonongku”

      1.     Batang aek usehonongku ninna Debatanta i, ingkon bornok bahenonKu tano na mahiang i, parhorsihan sasude, ingkon gabe porlak be. ~~~~Jongjong ma hita saluhutna~~~~.

               3.      Ingkon jumpang do HataNa, ai burju do Tuhan i, ingkon saut pinarbagaNa naeng sangap goarNa i. Ingkon do tandaon ni nasa bangso Tuhan i.

      15.    Manghatindangkon Haporseaon:

L       :Tahatindanghon ma haporseaonta i rap dohot donganta sahaporseaon   di sandok portibi on, Rap ma hita mandok:

S:      Ahu porsea.......! ~~~~Hundul ma hita saluhutna~~~~

16.      Sunggulsunggul

      17.    Marende No. 99: 1-... “O Tondi Parbadia i”         (Pel IA & I B)

       1.     O Ulu balang na gogo, songon sadari on do Ho manaek tu hasangapon. Naung sidung do ulaonMi; na ringkot patupaonMi, humophop hajolmaon. Sabam, tongam do Ho muli tu na uli mar-habangsa di siamun ni Jahowa. 

       2.     O Jesus Ho do Ulu ni luhutna na porsea i ruasMu anggo hami. Ho hangoluannami on Ho hasonangannami on, Ho hagogoonnami. Suru, togu, rohanami asa hami mangalehon tu Ho nasa hasangapon.

       3.   Sai taiti rohanami on, urupi hami on tongtong mangalo dosanami.  Paias rohanami be, parangenami baen ture nang panghataionnami. Tompa, roha, na imbaru, asa haru monang hami maralohon dosanami.

18. Jamita: Epesus 1:15-23

      19.  Marende No. 130: 1-...”Parohon harajaonMi”    

(Pasahathon pelean tumpak tu Pengembangan Masyarakat HKBP)

1.     Parohon HarajaonMi, sahalaMi do i. Dibahen i O Jesuski, ndang jadi sundat i. Alai ianggo eme i. Ndang olo marparbue i, ianggo so na mate i di na buni di tano i, Denggan do i dibaen naung mate i.

2.     O Jesus ndada sahat Ho tu hasangaponMi. Tung sura na manjua Ho manaon na porsuk i. Sai jalo hami on sude tu harajaonMi muse. Ndang na manjua hami on maniru Ho di tano on. Pabongot pe tu surgo hami be.

3.     Naung mate Ho di tano on, sobokkon eme i. Sondangi ma portibi on, na sahat di Ho i. Sai suru angka na posoM mangaliati tano on, mamaritahon hataMi; sai naeng tumpahannami i. Manumpak be do hami on sude.

        20. Parsuruon tu ngolu na imbaru:

      L:     Hamuna angka dongan! Nunga tahalashon hananaek ni Tuhan Jesus tu banua ginjang! Ndang berengonta i sian parsirangan ni jolma dohot Ibana. Alai hananaek ni Tuhan Jesus tu banua ginjang, i ma mula ni sada tingki na imbaru, ai nunga diparade Tuhan Jesus inganan di hita di banua ginjang i. Ndang na magopo hita tinggal di portibi on, dilehon Tuhan Jesus do na tau siulahononta: Borhat mamaritahon Barita nauli tu saluhut na tinompa. Taulahon ma i dibagasan las ni roha situtu tanda ni na tasomba Ibana di pardalanan ni ngolunta. 

       H:   I do tutu! Nunga dohot hita partohap di tugas na imbaru na nilehon ni Tuhan Jesus, asa tung margogo hita mamaritahon Barita Nauli hangoluan i, tamulai ma sian dirinta sandiri, keluarganta nang di parsaoran siganup ari di tonga-tonga ni masyarakat pe.

       S:    Mangendehon: No. 672: 1 + 3 “Tung godang situtu ulaonmu”

     1.     Tung godang situtu ulaonmu antong dipasahat Tuhanta tu ho. Ndang adong be tingkim marnalemba tahe ngolumi bahen tiruan tongtong. Ref. Sai patupama i ala ni Tuhan i so manghirim balosna tu ho. Debata do marnida na niulami manang na adong parbue ni i.

          3.  Ala ni boan ma sondang na tiur i, boan ma Hata ni Tuhan i. Sai urupi na pogos na mardangol i, asa ro tu Jesus Tuhanta i. Sai patupa..........

        21.    Tangiang: Pelean – Parningotan di Hananaek ni Tuhan Jesus    22.     Pasupasu – Amen- Amen-Amen

         Ai dibanua ginjang do sambulonta; sian i do tapaimaima Sipangolu hita  Tuhan  Jesus Kristus i (Pilipi 3: 20).

Hkbpressorttigalingga.blogspot.com

Pdt Budianto Sianturi