Jamita Minggu Jesaya 55:10-13

Ginurithon ni Pdt Sikpan Sihombing MTh

JESAYA 55:10-13

HATA NI DEBATA INGKON SAUT JALA MAMBAHEN JOLMA 
MARDAME DOHOT MARDENGGAN

1.Dongan sahaporseaon na hinaholongan di bagasan Tuhanta Jesus Kristus, na jolo masa do di tonga ni halak Batak (Toba) “manolon” (ima na sai mandok goar ni Debata di naso dalan na), alai ianggo naueng, (raaaa/kemungkinan ... ) ndang masa bei, ala ndang hombar be i tu poda ni hakristenon. Halak na sai di bagasan hasipelebeguon do nuaeng halak molo sai girgir “manolon”. “Manolon” lapatan na i ma na sai mandok “mangasahon goar ni debata manang sumangot ni ompu”, mandok sidohonon na ingkon masa tu diriniba molo iba parsala, jala ikkon masa tu diri ni alo niba molo iba na tingkos. Tingki didok hata i, dibahen sada pambahenan songon dia ma na marsala i dijoloan ni ari. Isarana, “sai dibuat bojak ranggangi ma ho nian, jala diribakkon bojak i ma ho nian”. Ditambai ma muse hatai mandok, “Sai songon bojak on ma parmate ni siulahon hasalaan . Molo au i, tu au ma masa i, alai molo so au i, tu na manuhas au i ma masa i”, ninna. Hata panolonon na asing mandok: “Dekke ni Sabulan, disi tonggina, disi tabona; siose padan tu ripurna tu magona.” Nang pe hata “panolonon” on dibahen na jolo, di jaman ni hasipelebeguon, alai dietong do sahat tu saonari marlakku, jala ala ni i tung mansai ringkot do di tonga ni halak Batak (Toba) mangingot dohot mandalanhon padan ni ompuna najolo i, tarlumobi di padan parmargaon. Tarida ma i di angka panjouon ni partuturon di tingki adong ulaon adat (unjuk manang saur matua). Angka na tarlibat di panolonon i sahat tu pomparanna sai manuluthon hasasaut ni tolonan i di bagasan ngolu nasida sandiri dohot di ngolu ni angka pomparanna. Molo adong na mate tompu, mate so suman, sai didok ma i ala ni pangontak ni panolonon i. Molo sada marga sai lam marpinsur, jala laos punu, didok ma i ala lupa tu padan ni ompuna najolo. Alai molo lam mardohar do na manolon i, dirajumi jolma ma na so parsala ompuna najolo tingki na manolon i. Halak Batak (Toba) mandok, hata nanidok di panolonon pasti do tarjadi i, nang pe holan hata ni jolma sambing do i, jala ndang hata ni Debata i. Ai “hori ihot ni doton, hata do siingoton”, ninna halak Batak (Toba). Mangula do hata i, marpangontak, marpanghorhon, jala mambahen masa na masa. Ala na songon i do hebat ni hata ni halak Batak, umbahen diorai manolon, ai adong di bagasanna ulaon manguhumi, na turun temurun. Pinaboa on dison, asa ganup do mamboto: Haru hata ni jolma boi songon nanidok i, ba lam hata ni Debata ma ? Humebat sian hata ni jolma dope hata ni Debata, pangontak na, panghorhon na, hagoon na mambahen masa na masa.

2.Marhagogoon (marhuaso) do hata. Ala ni i do ndang siparmeammeamon hata (unang marhata hoaxxx ... ist. hata nuaeng). Ai molo pinarmeammeam hata, mangontak do i tu iba, olo gabe masa na so lomo ni roha, masa bada, sampe na sahat tu penjara. Alai hata do parsimboraan, na boi gabe partahanan dohot parsaulian, sibahen masa hadomuan dohot pardamean. I do umbahen masa songon nidok ni umpasa: “Barisbaris ni gaja di rura Pangaloan, molo marsuru raja dae do so oloan, ai molo nioloan dapot do parsaulian, molo so nioloan sai masa do harugian.” Risirisi hata ni jolma, lamotlamot hata ni begu, lamboklambok hata ni Debata. Dia ma harision ni hata ni halak Batak Toba ? Ala marlakku jala masa di nasida pangontak ni hata on: “Siboru puas siboru namora, molo dung puas, sae soada mara.” Dia ma lamot ni hata ni begu? Ala marpangontak do pangulpukon ni datu na pasahat tona ni sumangot ni ompu, na mandok: “Asa gabe jala mamora hamu sude pomparanku, unang pasombu hamu holiholiku ambolong di adaran i, bahen hamu au tu batu na pir, asa mamasumasu sahala-ku tu hamu.” Lamot situtu hata ni begu na songon on.

Dia ma lambok ni hata ni Debata ? HataNa lambok manjou: "Ro ma hamu tu Ahu, hamu angka na loja jala na sorat, asa hupasonang hamu!' (Matius 11:28). "Dok ma tu nasida: Songon sintongna mangolu ahu, ninna Tuhan Jahowa, tung na so lomo do rohangku mida hamatean ni halak parjahat i, so ingkon mida hamumulak ni parjahat i tumadingkon dalanna i nian, asa mangolu ibana. Antong sai mulak ma hamu tumadingkon dalanmuna angka na jahat i! Boasa tung tagonan mate hamu, ala pinompar ni Israel?" (Hes.33:11). Lambok situtu do hata ni Tuhan i, jala ingkon/pasti do masa na songon i. Alai boha do tahe hata ni sibolis? Marpalait do hata ni sibolis. Songon na masa tu si boruboru, na gabe margoar si Hawa i: “Dung i ninna ulok i ma mandok boruboru i: Ndang na tutu hamu mate. Ai diboto Debata do, sadari dipangan hamu sian i, tonggor ma matamuna, gabe doshon Debata hamu umboto na denggan dohot na roa” (1Musa 3:4-5). Hata ndang martuhor. Alai marhagogoon (marhuaso) do hata. Ala ni i, ingkon ma hata na denggan hatahonon, asa masa angka nadenggan di tonga ni hajolmaon dohot di portibi on.

3.Panurirang na manurathon surirangna di buku ni Jesaya jilid dua on, na mangolu di tingki tarbuang halak Juda tu Babel (sazaman dohot panurirang Hesekiel, dipudian ni panurirang Jeremia, +/- taon 587 sM – 515 sM) patudoshon hata ni Jahowa na haruar sian pamangan ni Jahowa tu udan dohot ambolas na madabu sian langit tu tano, jala mambornoki tano hadabuanna, jala ala nabornok i tano i, gabe boi ma martubuan di tano i angka suansuanan na marparbue na hasea di jolma dohot di suansuanan i. Tutu, sada tudosan na tarbatas do i. Lobi sian udan dohot ambolas i dope hagogoon, pangontak, panghorhon ni hata ni Jahowa Debata tu angka nanihonaanna. Alai asa mura tangkupon ni halak Juda na tarbuang i dohot jolma sinuaeng, dipillit ma tudosan na sederhana on. Jojal manang gabe gurun, tano bakkalbakkal do tano molo so hea tonu dibahen aek. Udan ma nahumatop manonui tano na bolak. Molo tung adong pe angka boni (bibit) ni suansuanan di tano i, ianggo so adong do aek mamornoki, ndang marlata (tubu) boni i. Taboto do tangkas na songon i nang sian barita panompaon i: “Tagan so adong dope di tano on nasa ramba, jala tagan so martumbur dope nasa bulungbulung di ladang, ai ndang dope diparo Debata so udan tu tano on, jala ndang adong dope jolma na mangula tano i. Alai martimpul ma uap sian tano on, gabe dibornohi sandok sisik ni tano on” (1Musa 2:5-6). Najolo di tano Juda na so adong irigasi, tung holan udan do diarop roha ni jolma na boi mambornoki tano, jala laos udut tusi na manontuhon hadengganon ni ngolu ni jolma. Mauliate ma di Jahowa Debata na mangatur iklim asa boi ro udan di tingkina be. Molo adong do dalan na asing laho mamornoki tano i, olo do ndang parduli jolma ro manang so ro udan i. Di Isarel nuaeng, ala naung boi disalurhon mual tio (air tawar) tu sude negeri nasida, tu dolok nang tu rura, tu kota nang tu parhorsikan (gurun pasir), ndang be holsoan nasida ro manang so ro udan. Alai porlu do botoon, na ikkon adong do boni di tano sibornokan ni udan i, asa boi tubu suansuanan disi, jala marparbue na denggan. Molo so adong do boni disi, parcuma do udan i ro, nang pe digoari udan i “udan paremean”, manang udan sipahapitu manang udan sipahasada, manang udan pasupasuan, udan nene, manang udan panaburon manang udan gotilon patumonaan. Jadi ikkon adong do boni di tano na mahiang i paimahon ro udan i. Jala boni i ikkon ma boni nadenggan jala ndang na martihas.

Molo tudosan ni ulaon marbarita nauli ma haroro ni udan i laho mambahen tubu boni na di tano gurun pasir i, angka dia ma boni na ingkon paradeon (adong) di ngolu ni jolma i, asa molo dung ro hata ni Debata tusi gabe martubuan angka boni i? Boni na ingkon adong i songon on ma: paradaton na mambangun hajolmaon; hasintongan; haporseaon monoteistik; perikemanusiaan, hasadaon, demokrasi, haadilon, dohot lan dope boni na asing na denggan. Molo sai tartanom (ndang boi mullop) dope boni na songon i di ngolu ni sada bangso, molo ro hata ni Debata, pintor boi ma i martubuan jala gabe namanontuhon di ngolu ni bangso i, dung i marparbue. Parbuena i ma angka boni na dumenggan dope sian boni indukna (ibarat ni angka boni unggul), asa boi muse tubu angka na dumenggan di tonga ni bangso i. Asing ni i hasilna molo tubu angka boni na “modom” i hian, i ma “roti” hangoluan na boi dinikmati angka jolma di tonga ni bangso i. “Roti” na nidok dison i ma suasana ngolu na mansai denggan, ala gabe sukkup sude angka na rikkot tu ngolu siganup ari.

4.Molo ro hata ni Debata, ndang mulak boti hata ni Tuhan i tu Tuhan, so jolo dibahen lomo ni roha ni Jahowa, jala manjadi tu jolma (tu natinompa ni Jahowa) na gabe hahonaan ni hata i. Molo songon i do, siluluan on do: Aha do hata ni Jahowa Debata? Si Jeremia pasahat hata ni Jahowa na mandok tarbuang Juda 70 taon lelengna, na mandok asa bangunon ni bangso Juda kota di dia nasida maringan; adong na paboahon na mulak do bangso Israel tu tano Juda. Hira sude do isi ni buku Jesaya Jilid Dua marisihon hata surirang taringot tu haluaon ni Israel/Juda dohot “pemulihan” ni Israel/Juda/Jerusalem. Sude hata ni Jahowa on pasti (jala nunga tarbukti di sejarah ni Israel/Juda naung) masa na didok di hata ni Jahowa i. Aha do hata ni Debata tu bangsota Indonesia manang tu Huria Kristen nuaeng on? Hampir so adong be na olo paboahon tegas, aha hata ni Debata tu bangso Indonesia. Hata sipasingot na ma na boi dohonon: “Sai na makmur, sejahtera, maju, mamora jala marhasonangan do hamu saluhut bangso Indonesia, so mardiaimbar, asal ma tongtong hamu rukun, dame, masi-tukkoltukkolan, masiaminaminan, ndang marbolatbolat ala ni angka agama, houm dohot haroroanmuna be, asalma jujur, ndang korupsi, karejo hombar tu hamaloonna be, mangula jala mangolu hamu hombar tu lapatan ni Pancasila, bhinneka tunggal ika, pandalanhonon tu undang-undang dasar 1945 na konsisten dohot pangantusion na denggan taringot tu parbangsoonmuna bangso Indonesia; jala marsiadu hamu saluhutna mambahen hamajuon i.” Di balik ni hata sipasingot on, pasti do boi dapot ni ganup paragama di Indonesia hata ni Tuhan na be na manjujui mangoloi sipasingot on. Di bagasan sipasingot on ma nang halak Kristen nian mangolu jala mandalanhon parhuriaon na be.

5.Adong do alasan manjujui Huria dohot bangso Indonesia mangoloi sipasingot on. Alana diparbaga Debata do, songon nanidok ni hata-Na na mandok: “Ai ikkon di bagasan las ni roha hamu borhat, jala di bagasan hadameon hamu pataruon; pangiaron ni angka dolok dohot robean soarana marolopolop di jolomuna, jala nasa hau di ladang martopaptopap tangan. Sikkat ni tadatada tubu ma sampinur, jala singkat ni latong tubu ma bunga na hushus; i ma bahen barita di goar ni Jahowa, bahen tanda salelenglelengna, na so olo hambar. Ndang lomo roha-Na, bangsoNa sai torus didondoni arsak, hagaoron, jala sai holan na mangandungi. Ndang lomo roha ni Jahowa, bangso Israel/Juda torus tarbuang. Ingkon borhat bangso na i di bagasan las ni roha maninggalhon habuangan i, maninggalhon arsak, dohot pardangolan i. Halak na di bagasan las ni roha i ma halak naung dapotan panghirimon na denggan jala marsemangat lao mangeahi aha nahinirim ni rohana i. Sihirimon ni bangso Juda tingki i i ma : boi mulak tu Jerusalem, boi mambangun bagas joro ni Jahowa muse; boi mambangun parik ni Jerusalem muse, boi mangatur pamarentaon na muse; boi pangoluhon paragamaon nasida muse; boi mambangun hajolmaon nasida muse. Aha ma panghirimon naung dapotta nuaeng di tikkion? Boi mambangun Indonesia di segala bidang rap dohot dongan sabangso di Indonesia. Boi maragama mansai denggan, tarmasuk boi sonang maribadah dohot mambangun angka bagasjoro pamujion tu Jahowa Jesus Kristus. Boi mangolu di bagasan dame, aman, jala kreatif. Boi marpinompari di bagasan hadengganon. Boi mangan jala dapotan dalan ni ngolu na denggan. Boi marpolitik, marekonomi, marsosial, marbudaya, maragama/marhuria, marlingkungan, marilmu, marparbinotoan, markreasi, manjaga negara denggan. On ma panghirimonta naung dapotta di Indonesia na luarbiasa on.

Syarat utama laho boi mangeaki na dihirim roha i, ingkon adong hadameon di tonga ni bangso on. Dung mardame do angka tinggal-tinggal ni bangso Israel dohot Juda na di habuangan i, umbahen boi nasida dipataru lao mulak tu Jerusalem. Ndang diingot nasida be parbadaan ni si Jerobeam dohot si Rehabeam, parbadaan ni Harajaon Israel Utara (Samaria) dohot Harajaon Israel Selatan (Juda). Sude pangambat tu hasadaon dohot hadameon ni nasida, dibolokkon nasida. Parsalisian agama pe dibolokkon nasida. Di Indonesia, ndang songon pengalaman ni Israel pengalaman ni angka suku bangsa na adong di Indonesia on. Boi jumpang hadameon di tonga ni bangso Indonesia na marragam di segala hal i, molo olo do ganup horong konsisten tu angka naung ditolopi gabe konsensus nasional. Misalna konsisten manjujung Negara Kesatuan Republik Indonesia, ndang Negara Khilafah Indonesia. Konsisten manjujung ideologi Pancasila; manjujung bhinneka tunggal ika, manjujung undang undang dasar 1945 i; jala konsisten rap mambangun Indonesia di bagasan hajujuron, hatuluson, jala hombar tu haboion ni Indonesia sandiri.

6. Boi angka dolok dohot robean marsoara nagogo jala marolopolop, jala nasa hau martopaptopap tangan, molo diurus bangso on do ngolu ni nahumaliang (“lingkungan hidup”)-na. Dia adong hau na boi mambahen songon i molo dung do gundul sude dolok i dirambah. Toho do ingkon uruson angka hau di dolok i. Tugas do i mangganti tadatada dohot sampinur. Mangganti hau na marsugasuga, na so boi pargunahonon ni jolma dohot hau na so marsugasuga jala na mansai porlu pakkeon ni jolma laho mambangun jabu dohot bangunan na asing. Jala ikkon sanga do sahat tu na matoras angka hau sampinur i, baru pe asa dipanen, jala ingkon adong boni ni sampinur na tubu bahen sikkatna. Sada ditaba, saratus sikkatna. Ikkon gantion do latong (sibahen gatal jala maderder daging ni jolma molo hona rintopna) dohot bunga na hushus ( suansuanan na manjou jolma marroan holan manganggo uapna na hushus i). Di naung disangkapi Presiden Jokowi mambahen Taman Huta Ginjang di Toba, dohot mencanangkan Kawasan Wisata Danau Toba, asa marroan touris manganggo haanguron ni angka suansuanan disi, dohot marnida haulion ni humaliang Danau Toba, tung mansai las ma roha ni sude pangisi ni Toba/Tapanuli Rea. Alai molo so jadi do i, tung siarsakhonon do i. Boi dohonon, tahi na hombar tu hata ni Jahowa do sangkap ni Presiden Joko Widodo do i. Apala holan tombak Pinus ma metmet/sompit do adong di lambung ni kota Yogyakarta, nunga tung mangusanggus angur na tu portibi on, mambahen ro mariburibu jolma holan mangonsop udara segar di inganan i. Molo adong harangan na diurus Huria ma asa lestari jala manggusanggus angurna tu portibi on, na mambahen tarbarita do goar ni Jahowa na binahen ni Huria i. Jala molo lestari do ulaon na songon i, gabe tanda salelenglelengna do i na so olo hambar, di tonga ni hajolmaon. Haru hutan pinus na marsurat RIMBA CIPTAAN na adong di Samosir jala boi jahaon najolo sian dalan panatapan mandapothon Parapat, haru sai diingot jolma na hea mamereng i najolo sahat tu nuaeng on. Tarlumobi ma molo adong hutan sampinur marribu hektar di Tapanuli (humaliang Tao Toba), mardongan hutan bunga na hushus (hutan pohon murad), pasti tung tarbarita do goar ni Jahowa, jala gabe bahen pujian di goarNa molo huria do na mambahen hutan i. Taeaki ma i, tahangoluhon ma hata ni Jahowa, jala tabahen dirinta be gabe inganan HATA ni Jahowa Jesus Kristus na marparbue jala hasilna porlu tu angka boni i dohot tu aknga hajolmaon. Asa butong jolma i marhite sipanganon partondion dohot sipanganon pardagingon.

Amen.

Anggiat ma boi mangurupi jala marguna tu hita be

Catatan-catatan tambahan:

HATA di hata Heber didok dabar, ’omer; di hata Gorik: logos, rhema. Bagas jala bidang do angka lapatan ni angka hata on, alai na ringkas i ma dipaboa dison. Dabar i ma angka hata na haruar sian pamangan na mandok na toho jala mambahen masa na masa. Adong do i na marrumang boaboa (tarmasuk tuson hatorangan, turiturian), parsuruon/parenta, pangoloion, panjuaon, joujou, hatontuan (tarmasuk tuson padan, janji, sumpa). Sude na i mampanghorhon tu nadapotan hata i. ’Omer i ma angka nahinatahon ni simangkudap paboahon angka naung masa dohot na nanaeng masa, jala siparrohahonon ni ganup naumbegesa dohot naumbotosa. Angka hatontuan na nisurathon, na wajib didalanhon halak na marhahonaan tu panghataion i, didok do i ’amar. Molo logos di halak Junani, naharuar sian simakkudap i ndang holan mangula, mampanghorhon, mambahen masa namasa, alai boi do patuduhon dirina marhite rumang (wujud) pinillitna sandiri asa haru tangkas bahenonna ulaonna. Di halak Batak Toba sipelebegu, logos na songon i ditanda marhite tabas (mantera) na boi ro manjumpai sadasada jolma marrumang natarida dibereng mata satokkin. Rhema i ma angka nahinatahon asa dibege jala diparrohahon halak, alai adong do sian hata i na boi gabe hangoluan manang gabe hamamago tu namambege, hombar tu isi ni rhema i, jala boha sikap ni jolma na mambege rhema i.