SERMON TU MINGGU 23 OKTOBER 2016 Lukas 18:9-14

MINGGU

23 OKTOBER 2016

 

Ev : LUKAS 18 : 9-14

NA PAORU DIRINA IDO SIPATIMBOON

BARANG SIAPA MERENDAHKAN DIRI,

IA AKAN DITINGGIKAN

======================================

SENIN 17 OKTOBER 2016

SERMON JAMITA TU MINGGU XXII DUNG TRINITATIS 23 OKTOBER 2016

LUKAS 18 : 9-14

NAPAORU DIRINA, IDO SIPATIMBOON

BARANG SIAPA MERENDAHKAN DIRI , AKAN DITINGGIKAN

=====================================

I.                   Patujolo

Buku Lukas ima sada sian Injil na opat i,  na sinurathon ni Si Lukas dohot panurat ni Ulaon ni angka Apostel na tinujuhonna tu Si Teofilus, Jala disurathon hira hira Taon 62 M, Marisihon asa sude na porsea lam tang dibagasan haporseaon, marhite sian Barita dohot pangulaon ni Jesus, ia Turpuk on Tarmasuk bagian ni pangajarion ni Tuhan Jesus tu angka na torop di Efraim,  ima namarpardomuan tu ringkot ni ruhut parngoluon, parange nang pambahenan, nang Partangiangon. Dibagasan turpuk on digombarhon Tuhan Jesus do songon dia rumang ni partangiangon na sintong marhite perumpamaan taringot tu sada halak na manghaposi dirina na mandok na tigor ibana, (Parise ) ima sada horong ni masyarakat natumimbo di ugamo Jahudi jala mansai berpengaruh do nasida di masyarakat, jala jotjot digoari siboto patik manang siboto surat, Dohot sahalak na unjur marroha ima si jalo beo (Pemungut cukai ) Pegawai sijalo balasting ni pamarenta Roma, napapunguhon angka pajak sian angka masyarakat . Digombarhon do diturpuk Jamita on ima taringot tu parise dohot sijalo beo na nangkok tu bagas joroi laho martangiang.

II.                Hatorangan

Marragam do Metode ni Jesus mangajari asa umbuk tu roha ni angka na niajaranna, Jala mura antusan ni angka na umbegesa, ima marhite angka umpama, laos di hatahon Tuhan Jesus ma sada umpama taringot partangiangon ni sada halak parise dohot sijalo beo,Tabereng ma dua Pangalaho dibagasan turpuk on ima, Pangalaho ni parise dohot Sijalo beo Naparjolo Pangalaho ni  Parise ima na menganggap dirina na sumintong, (Mengganggap dirinya lebih benar) na badia, (Lebih suci ) jala mar hu ni roha mida donganna,(memandang rendah semua orang )  Tumimbo dirina sian na asing jala humebat .“Dirgak ma parisei jongjong huhut martangiang di bagasan rohana marhite na mandok“Mauliate ma ahu tu Ho ale Debata, ala so dos ahu dohot halak na leban, angka pamunu, pargeduk, pangalangkup, manang songon si jalo beo an” dipaboa ibana na dua hali ibana marpuasa saminggu, dohot pasahathon parsampuluan sian saluhut na ni omona. Dipaburnang burnang ibana dirina, ginjang rohana jala patengatengahon. Neang rohana ala dirajumi ibana naung tigor ibana di jolo ni Debata. Merasa sempurna dipaboaboa nabinahen na mardongan ginjang ni roha. Mamuji muji dirina, paboa boa hasurunganna asa diboto jolma ibana na naburju , hape holan di ruhut parduru doi idaon, holan sipaula-ula do i, ndang diboto saluhut do diboto Tuhan i,  Ai so si ida rupa Debata, On ma na ginoaran Kesombongan Rohani. Ende No 161 : 2  “Ai holan asiasiMi patupa paruntungan, indada pambahenan mi tungpe marhasurungan, sipuji diri talu do, ingkon mabiar mida Ho, sude marhuhuasi”

Napaduahon Pangalaho ni si jalo beo, Ianggo si jalo beo i, “Mandaodao do ibana jongjong; gari manaili dompak ginjang ndang barani .Alai ditompuk do andorana huhut mandok ; Asi ma rohaM Ale Debata di ahu pardosa on”. Ditanda ibana do dirina na halak pardosa do ibana,(Pat Luk 5:8) Tungki do ibana huhut mandao dao, mabiar ibana dumonok ai dirajumi na so patut ibana ala ni dosa na,  ditompuk andorana paboa na manolsoli do rohana di angka hahurangan na, Dipataridahon ibana haserepon ni roha dao sian haginjangon ni roha dirajumi  Ndang adong na boi paluahon ibana so holan Asi ni roha ni Debata. Diauhon rohana do na parasiroha Debata di angka na olo paubahon jala manopoti angka dosana, Sandok parroha na magopu ma ibana (Pat Psalm 51:19)  Holan asi ni roha ni Debata nama dipangasahon rohana sada do pangidoanna “Asi rohaM di au pardosaon” Ende No 183 :3 “Onpe holan asi ni roha sipangasahononton i. Sipujionku do Jahowa dung ro na pamanthon i. Unduk huhut las rohangki,;,; Mamuji asi roha i mamuji asi roha i”

Sian umpama i  tangkas do didok Jesus “Hudok ma tu hamu; Umpintor do on laho muli asa na sada an, Ai sipaoruon do ganup napatimbo dirina; alai na paoru dirina, i do sipatimboon”. Halak na pinintoran ni Debata ima halak na tangkas mananda dohot manolsoli dosa dohot hahuranganna, na mangasahon Asi ni roha ni Debata, jala na martoruk ni roha jala dibagasan haserepon  roha. Halak napatimbohon dirina di alo, dihagigihon,  dihasogohon Debata  Ende No 187 :3 “Dialo Ho sude na jungkat roha, natimboi dipatutoru Ho. Alai sude na serep i marroha, ido na sai diasiasi Ho. Parhata na gogo di tano on dihagigihon rohaMi sude; na dangol I ditatap Ho hape, naeng urupan mu angka i tongtong”

III Sipahusorhusoron

1.   Tapadao jala tapasiding ma angka haginjangon ni roha, namarpangea, paboahon soara ni ogung,(Kesombongan Rohani) tapadao ma pangalaho songon Parisei, alai tatiru ma sikap songon si Jalo beoi na unduk jala serep, olo manopoti dosa dohot hahurangan na. Sada sikap na mansai uli ima manghaholongi angka dongan ndada paroaroahon, Ndang menganggap diri lobi tumimbo sian na asing. Mananda diri dohot mangido asi ni roha ni Debata, Unang paburnang burnang diri alai maporus ma tu Asi ni roha ni Debata

2.   Unang tapangasahon haboion ta, na nilehonta tu Debata, alai lam tapaserep ma rohanta huhut martoruk ni roha “ Napaoru dirina ido sipatimboon

3.   Marroha na bulus ma hita, mamuji, marsaor dohot martangiang tu Debata, ai angka sisongoni do napinintoran ni Debata  Mat 5 : 9 “ Martua ma parroha na ias ai idaon nasida do Debata.

4. Tatopoti ma angka dosa, hahurangan ta tu Debata ai Parasiroha do Ibana, maporus ma hita tu Asi dohot holong ni roha ni Debata 1 Johannes 1:9 “Molo tatopoti angka dosanta, haposan do Ibana  jala bonar manesa dosanta jala paiashon hita sian nasa hageduhon. Amen

hkbpressorttigalingga.blogspot.com