HKBP Ressort Tigalingga Distrik VI Dairi: April 2019

PRAESES, PENDETA RESORT DAN PANITIA

TOPIK:

OLOI MA DEBATA JALA PAUBA ROHAM

2 MUSA 33:1-6

MINGGU 10 PEBRUARI 2019

01. PANGARADEON DIRI

Ø Saluhut ruas ni huria mambuat hundulan hombar tu sektor na be.

Ø Sude Parhalado mamahe baju parhobas, rap dohot panitia borhat sian bilut

Ø Dua ma koor namarende ima Koor Gabungan dohot Remaja

Ø Ditingki mardalan Prosesi jongjong ma sude Ruas huhut manghuling giringgiring

— tingki na hohom —

02. Jou jou tu Parsaoran ( Sude Parhalado dohot Panitia jongjong di jolo )

Pdt : Huria ni Debata na dihaholongan ni Tuhanta Jesus Kristus, hami saluhut Parhalado, pasahathon tabe ma tu sude hamu ruas ni huria: Asi ni roha ma di hamu, jala dame na sian Tuhanta, ima na mangaramoti hita saluhutna.

L 2: Dibagasan sadarion tung tama do hita mandok mauliate tu Debata, disaluhut pandonganion dohot pangaramotion ni Debata di sude pardalan ni ngolunta. Di ari sadarion dipaloas Debata huria-Na, patupahon PESTA GOTILON, manghalashon pasu-pasu dohot denggan basa ni Jahowa dibagasan ngolunta. Saluhutna i tung asi ni roha ni Debata do i tu hita. Ala ni tapuji ma Tuhanta jala tasomba ma Ibana, taendehon ma “Sangap ni Jahowa”

H : (mangendehon BE 581: “Sangap ni Jahowa”)

Sangap ni Jahowa na sun timbul i, balga ni holongNa ndang tarasam i

Dilehon AnakNa na sasada i, manobus hita jolma pardosa i

Pujima Debata ale manisia, las roham, las roham somba ma Debata

Dapothon Jahowa na sun timbul i, marhite AnakNa Tuhan Jesus i

L3 : Tung so tarasam hita do balga ni holong ni roha ni Debata, dibagasan pardalan ni ngolunta, jala tung so hasuhatan do denggan ni basaNa. Antong haholongi ma Debata sian nasa roham, sian nasa ateatem dohot sian nasa pingkiranmu. Robe ma hamu tu adopanNa jala somba ma Ibana.

H : (mangendehon BE 581: “Sangap ni Jahowa”)

Tung so hasuhatan do basaNa i, marhite AnakNa ni lehonNa i

MudarNa durus do di hau silang i, rara pe dosanta ias di baen i

Pujima Debata ale manisia, las roham, las roham somba ma Debata

Dapothon Jahowa na sun timbul i, marhite AnakNa Tuhan Jesus i

L1 : Pillit ma sadarion, manang na ise do sioloanmu: hagogoon portibion do manang Debata si lehon hangoluan? Pillit ma sadarion manang na ise si sombaonmu: debata sileban do manang Debata sitompa langit dohot tano.

H : Alai anggo au dohot donganhu sajabu, Debata do sioloan dohot sisombaon nami.

… jongjong … ( Mulak ma Parhalado dohot Panitia mulak tu hundulanna )

H : (mangendehon BE 581: “Sangap ni Jahowa”)

Balga situtu pambaenMi Debata, tung so hasuhatan holong ni rohaM

Tu jolma pardosa asi do rohaM, di ungkap, Ho dalan lao tu banuaM

Pujima Debata ale manisia, las roham, las roham somba ma Debata

Dapothon Jahowa na sun timbul I, marhite AnakNa Tuhan Jesus i

03. VOTUM – INTROITUS

L2: Marhitehite goar ni Debata Ama dohot goar ni AnakNa Tuhan Jesus Kristusdohot Goar ni Tondi Parbadia na manompa langit dohot Tano on.

H : Amen.

L3: Olophon ma Jahowa, ale sandok tano on! Oloi hamu ma Jahowa marhitehite las ni roha, ro be ma hamu tu joloNa marhitehite olop-olop.

H: Boto hamu ma on: Jahowa do Debata; Ibana jumadihon hita, jala Ibana nampunahita, bahen bangsona dohot biru-biru pinarmahanNa.

L1 : Bongoti hamu ma angka bahalNa marhitehite hamauliateon, angka alamanNa marhitehite pujipujian, mauliate ma roha muna tu Ibana, puji ma goarNa. Haleluya.

H : (mangendehon: Haleluya-Haleluya-Haleluya)

L2 : Martangiang ma hita: Ale Debata Amanami, mandok mauliate do hami tu Ho, di sude denggan ni basaM. Tung so tarasam do angka pambahenanMu, na mandongani dohot na mamasu-masu sude hami ruasMon. Sadarion dilehon Ho do las ni roha tu huriaM, na boi patupahon PESTA GOTILON dohot syukuran di pandonganion ni Debata di HuriaM HKBP Tigalingga. Mauliate ma rohanami ala dipamonang Ho do HuriaM sian angka hamaolon, marhite Putusan Pengadilan Negeri Sidikalang di ari 6 Desember 2017, jala dilehon Ho lasniroha di hami marhite naung haruar Sertifikat ni pargodungan on di ari 29 Desember 2018 nasalpui Tu Ho do hami pasahathon parsombaon nami, ala sian tingki tu tingki, lam mangerbang huriaMon dohot panghobasionNa. Dilehon Ho do sada ni roha di sude ruasMu jala didongani Ho do nang angka parhalado laho marhalado i huriaM. Antong sai sai saut ma harajaonMu dohot hamuliaonMu di huriaMon, dibagasan goar ni anakMu Tuhan Jesus Kristus si Palua hami. Amen.

— hundul —

04. Marende : 743 : 1 “O Tuhan Togu-togu Ma Au”

O Tuhan togu-togu ma au, tu dalan lomo ni rohaMi

Raphon Ho sonang mardalan au, nang rahis maol sidalananki

TondiMi baen manggohi au on, margogoihon au na posoMon

Pasangap Ho dingolungkon, paima sahat tu surgo au on

Ama : Panghulingi ma au o Tuhan, na rade tumangihon hataM

Ina : Sai tumpahi ruasMu Tuhan, na uasan nuaeng di hataM

Ama : Sai patau ma au on naposoM

Ina : Manjou halak na dao sian Ho

Sude: Ro di na so tumanda Ho, muba gabe pangoloi di Ho

05. MANJAHA PATIK

L1: Tangihon hamu ma patik ni Debata na nienet sian Roma 12: 2, songon on ma didok: “Na huapoi ma hamu, ale angka dongan, marhitehite asi ni roha ni Debata: Pasahat hamu ma dagingmuna bahen pelean na mangolu, na badia, na hinalomohon ni Debata; i ma hadaulaton ni na marroha.

L2: Jala unang gabe sarombang hamu dohot portibi on; alai gabe imbaru ma hamu,dung muba pingkiranmuna, asa tau hamu manimbangi lomo ni roha ni Debata,ima na uli, na hinalashonna dohot na sun denggan. Ima sahatna. Antong rap mangido gogo ma hita tu adopan ni Debata.

H: Ale Tuhan Debata sai pargogo I ma hami, mangulahon na hombar tu patikmi. Amin.

06. K o o r : Gabungan HKBP Tigalingga “ Bagas Uhirhon tu rohangkon”

07. Marende BE.No. 164 “O Tuhan Jesus Ho Rajangku”

O Tuhan Jesus Ho Rajangku Tangihon au naposoMon

Naeng topotanku do dosangku Tu Ho Sigomgom tano on

Ai naeng mangolu tondingki Marhitehite mudarMi.

— jongjong —

Godang do dosa ni tanganku Rohangku pe gok dosa do

Nang mate pe nang pamatangku Luhutna i gok dosa do

Sai sesa nasa dosangki Marhitehite mudarMi.

07. PANOPOTION NI DOSA DOHOT HASESAAN NI DOSA

L3 : Huria ni Debata na nihaholongan ni Kristus. Dibagasan unduk dohot serep ni roha, ro ma hita tu adopan ni Debata. Tatopoti ma dosanta tu Amanta Debata, jala tapangido ma hasesaan ni dosanta, dibagasan goar ni Tuhan Jesus Kristus Parasi roha i. Martangiang ma hita dibagasan rohanta be.

(… tingki na hohom… musik mangendehon BE. 683)

L1: Ale Debata amanami na badia jala na gok asi ni roha, manang na piga hali hami ro tu adopanMu, huparhatopot hami do sude angka dosa-dosa nami na godang i. Tung mansai jotjot do hami manirpang sian dalanMu, ndang mangulahon lomo ni roham. Nuaeng ro hami tu joloM mangido asi ni rohaM: Sai sesa ma sude dosanami jala unang paingot-ingot sude dosa nami na godang i.

L2 : Unang ma pabalia hami sian adopanMu ale Jahowa, ala ni dosa dohot hajahaton nami. Alai marpamuati ma rohaM di hami. Huparhatopot hami do, jotjot do hami lilu songon biru-biru masitondong dalanna be. Ndang be hu ulahon hami lomo ni rohaM. Asi ma roham di hami ale Debata, jala sesa ma sude dosa nami.

H : (mangendehon BE.No. 683“DiadopanMu Jesus”)

Di adopanMu Jesus, Lea tutu do diringkon

Dibaen godang ni dosangkon, diadopanMu Jesus.

L3: Ale Tuhan Debata, Amanami, Parasiroha na sumurung! Na pungu do hami di joloM martangiang tu Ho. Ndada mangasahon hatigorannami, na mangasahon as ni rohaM na godang i do. Sai asi ma rohaM mida sandok bangsonami, sesa ma dosanami saluhutna. Sai sungguli ma rohanami, asa muba roha dohot pangalahonami, ala ni Tuhan Jesus Kristus Tuhannami, sipangoluhami.

H : (mangendehon BE.No. 683”DiadopanMu Jesus”)

DiadopanMu Jesus, tarsolsol bagi rohangkon

Muba ma au tu jolo on, diadopanMu Jesus

L1 : Huria ni Debata naung manopoti dosa, nuaeng tabege ma hata baga-baga ni Debata, taringot tu hasesaan ni dosanta: Songon on do hata ni Tuhan Jahowa: Nunga pola hupasisi angka pangalaosim songon ombun, jala songon ombun manorop angka dosam. Sai mulak ma ho tu Ahu, ai Ahu do sipalua ho.

L2 : Tajangkon ma Jesus dibagasan ngolunta, jala taulahon ma lomo ni rohaNa. Hasangapon ma di Debata na diginjang.

H : Amin.

… hundul…

08. Marende, BE No. 467 “ Asi ni RohaM Hupuji”

Asi ni rohaM hupu ji ala Ho manobus au.

Di paias Ho rohangku, ga-be soranganMu Au.

IngananMu rohanami. TondiMi manggohi i.

Pangke dohot ngolunami gabe ulaulaMi.

Sai papulik rohanami gabe pangoloi di Ho.

Asa marsahala hami lao mangkatindangkon Ho.

IngananMu rohanami. TondiMi manggohi i.

Pangke dohot ngolunami gabe ulaulaMi

9. MANJAHA EPISTEL: Pangungkapon 3:1-6

L3 : Turpuk Epistel di Minggunta sadarion, ima na tarsurat di Mateus Pangungkapon 3:1-6, songon on ma didok disi:

L1: Surathon ma tu suruan ni huria Sardes: On do hata ni Partondi na pitu na sian Debata jala Parbintang na pitu: Huboto do angka ulaonmu; na targoar do ho mangolu, hape na mate do!

L2: Tarsunggul ma ho jala patogu ma donganmu na tading i, angka na naeng mate. Ai ndang jumpang Ahu di angka ulaonmu, naung gok di jolo ni Debatangku.

L3: Antong, ingot ma, manang songon dia na jinalom dohot na binegem; i ma radoti jala pauba roham! Dibahen i, molo so tarsunggul ho, ro ma Ahu songon panangko; na so jadi botoonmu sadiharina Ahu ro manopot ho.

L1: Alai adong do di Sardes otik goar ni halak, angka na so mangaramuni abitna; nasida ma mardalan sogot rap dohot Ahu marabit na saksak, ai na tau do nasida.

L2: Songon i ma uloshononhon abit na saksak tu na monang i; na so tupa be sesaonku goarna sian buku hangoluan i, hatindangkononku ma goarna di jolo ni Damang nang angka surusuruanna.

L3: Ditangihon na marpinggol ma na nidok ni Tondi i tu angka huria!

Ido sahatna. Martua ma halak na tumangihon hata ni Debata jala na umpeopsa.

H : Amen

10. Koor: Remaja HKBP Tigalingga

11. Marende BE.No. 757 “Dipardalanan Jesus Dijolongku”

Dipardalanan Jesus dijolongku, Holong ni tanganMi manogu au

Nang di ngoluku Ho do sombaongku, Tung sonang mardalan raphon au.

Huboto do tangkas pangouonMu, Diiringiring Ho do langkangki

Sahat ro di ujung ni pardalanku, Togu ma au jonok tu lambungMi,

— jongjong —

Parompuan : Patogu ma Tuhan haporseaonku, Asa polin tu Ho manghirim au,

Baoa : Tu surgo I patulus pardalananku, TondiMi maringan ma di au.

Parompuan : Huboto do tangkas pangouonMu,

Baoa : Diiringiring Ho do langkangki

Sude: Sahat ro di ujung ni pardalanku, Togu ma au jonok tu lambungMi,

12. MANGHATINDANGKON HAPORSEAON

L1: Hamu angka dongan ! Rap dohot angka donganta sahaporseaon di sandok portibion, tahatindangkon ma hata haporseaonta I, rap ma hita mandok:

H : Ahu porsea … dst.

— hundul —

13. TINGTING + TANGIANG PANGONDIANON.

14. Marende BE.No. 476 “Ndada Au Guru di Au”

(— pelean 1a & 1b —)

Ndada au guru di au be, Jesus do nampuna au.

Las rohangku dung hubege, Jesus sipangol au.

Ndang be au guru di au. Jesus na humophop au, Nampuna au.

Tung saleleng au mangolu, Jesus do nampuan au.

Ndang di au, Tuhan Jesus, daging dohot rohangki;

Saluhutna hupasahat tu Ho, Jesus Tuhanki.

Ndang be au guru di au. Jesus na humophop au, Nampuna au.

Tung saleleng au mangolu, Jesus do nampuan au.

— musik —

Ulaonku nang artangku pangke ma baen sangapMi,

Diusehon Ho mudarmu tung tanda do holongMi.

Ndang be au guru di au. Jesus na humophop au, Nampuna au.

Tung saleleng au mangolu, Jesus do nampuan au.

15. JAMITA : 2 Musa 33:1-6 ( Praeses )

16. Marende, BE. N0. 218 “Tong do Tau Haposan”

(— pelean II — )

Tong do tau haposan Tuhan Jesus I, Ala naung diporsan Do dosanta i

Hata nang dameNa Hangoluan ni, Angka na porsea Di hataNa i.

Hata nang dameNa Hangoluan I, Angka na porsea Di hataNa i

Sai tong didongani Na porsea i, Jala ganup ari Ro basaNa i

Tu na so marganggu Di gogoNa i, Na mandok Tuhanku Na sun denggan i

Tu na so marganggu Di gogoNa i Na mandok Tuhanku Na sun denggan i

— musik —

Guru di Ibana Sude tano on, Sintong do hataNa Na tu hita on

Asi ni rohaNa Na sumurung i Dipatongontongon Tu lomoNa i.

Ale Tuhannami Sai sondangi ma, Sude dongannami Na di Sumatra

Dohot halak Nias, Halak Borneo , Asa tung lam ias Lao managam Ho.

— musik —

17. ACARA PESTA GOTILON:

Pdt: Hamu ruas ni huria na nihaholongan ni Tuhanta Jesus Kristus! Nuaeng sahat ma hita tu acara PESTA GOTILON ni hurianta, laho manghalashon dohot manghamauliatehon denggan basa ni Jahowa. Antong dibagasan roha na mandok mauliate tu Debata, tapuji ma Ibana, taendehon ma BE No. 373 “Mangula Hita Jolma”

H : (mangendehon BE, No. 373: “Mangula Hita Jolma”)

Mangula hita jolma Manabur boni i, Alai anggo jadina Di Debata do i

Dilehon las ni ari, Nang nambur udan pe

Tongtong di panumpakNa Marguru sasude

Nasa ulibasa ro sian Debata, I pe Ibana puji ma Huhut haposi da.

(— ro ma tu jolo sude Parhalado —)

Sai sian Debatanta do nasa na adong,

Nang rihit sangkamata, Nang laut,nang tano on.

Tinompa ni hataNa, Do hau nang bulung i,

Nang nasa parbuena, Nang bungabunga i

Nasa ulibasa ro sian Debata, I pe Ibana puji ma Huhut haposi da.

Pdt : Hamu dongan sahuria! Nunga i tajalo denggan basa dohot asi ni roha sian Jahowa. Ta okuhon do, saluhutna silehonlehon na denggan, nasa ulibasa na mauliutus, ima na ro sian ginjang. Dilehon do di hita parbueni tano, parbueni suansuanan dohot parbueni angka ulaonta. Saluhutna i nunga tajalo sian Jahowa. Antong nda tama ma hita mandok maulite tu Debata?

H : Mauliate ma di Ho Tuhan, naung mangalehon parbue ni angka ulaonnami.

Pdt : Didok hata ni Debata: Ingkon buatonmu ma sian patumonaan ni sandok parbue ni tano i, na dapot ho sian tanomi, naung nilehon ni Jahowa, Debatam tu ho, jala pamasuhonmu do i tu bagasan ampang, jala boanonmu do i tu inganan sipilliton ni Jahowa, Debatam bahen inganan di Goarna. Ingkon burju do lehononmu parpuluan sian nasa gogo ni tano, boni sinaburhonmi, sian saluhut na tubu di tanomi ganup taon. (5Musa 26:2)

H : Mauliate ma di Ho Tuhan, naung mangalehon parbue ni angka ulaonnami. Hupasahat hami ma i bahen pelean na hushus di joloM.

Pdt : Antong! Taruhon hamu ma sintong parsampuluan i tu bagas parpeopan, asa adong bohal di bagasan jabungku, jala unjuni hamu ahu taringot tusi, ninna Jahowa Zebaot, manang so ungkaponku di hamu angka pandiloan ni langit, jala mangusehon tu hamu gabe maradu marlobilobi. (Maleakhi 3:10)

PASAHATHON SILUA:

– Ro ma sude ruas pasahathon silua hombar tu sektorna be ni uluhon ni Sintua sektor: Sektor 1; Sektor 2; Sektor 3; Sektor 4;Sektor 5, Sektor 6, umum (silua hatopan Sektor, silua marsadasada dohot amplop marsadasada)

– Ro ma punguan-punguan Koor pasahathon silua hatopan ni punguan i, ni uluhon ni katua ni punguan.

1. Marende BE. 848: “Dison Adong Huboan Tuhan”

Dison adong huboan Tuhan, parbue ni ngolungku na so tardok nian

Sadia ma argana Tuhan, Molo sai ni rajuman sude denggan basaM

Jalo ma Tuhan, Sai las ma rohaM

…musik …

Huingot do hataM da Tuhan, ingkon sarihononhon anggim na metmetan

Ampehon ma tanganMu sangkan, itak na otik I unang suda nian

Jalo ma Tuhan, sai las ma rohaM.

2. Marende BE.No. 585 “Somba ma Jahowa”

Somba ma Jahowa Debatanta Amen Haleluya

Sigomgom langit tano on ro diisi na Amen Haleluya

Beta hita lao, marsinggang tu joloNa

Amen Haleluya na songkal jala na badia do Jahowa

Amen Haleluya endehon Amen haleluya endehon

Amen haleluya endehon Amen haleluya endehon

Amen haleluya

— musik —

Puji ma Jahowa Debatanta, Amen Haleluya

Parasi roha na sumurung do Ibana, Amen Haleluya

Taendehon ma goar ni Debatanta, Amen Haleluya

Alani denggan ni basaNa tu hita, Amen Haleluya.

Endehon; “Amen Haleluya, endehon Amen Haleluya

Endehon Amen Haleluya, endehon Amen Haleluya”.

— musik —

Sangap di Jahowa Debatanta, Amen Haleluya

Na bonar jala marmulia do Jahowa, Amen Haleluya

Tapatimbul ma goar ni Debatanta, Amen Haleluya

Na tigor jala na sun gogo salelengna, Amen Haleluya

Endehon; “Amen Haleluya, endehon Amen Haleluya

Endehon Amen Haleluya, endehon Amen Haleluya”.

Pdt : Tadok ma mauliate tu Jahowa, ai pardenggan basa do Ibana, ro di saleleng ni leleng na do asi ni rohaNa tu hita. Nunga tapasahat siluanta tu huria-Na, songon parbueni angka na taula. Antong! Tangihon hamu ma hata ni Debata na mandok: Alai marhuaso do Debata, mangusehon saluhut asiasi tu hamu, asa sandok tuk situtu di hamu jala marlobilobi hamu, laho patupahon saluhut ulaon na denggan. Antong taharinggashon ma manghobasi huriaNa dibagasan dame, sada ni roha dohot holong ni roha. Jongjong ma hita

H : (mangendehon BE No 435: “Morolopolop Tondingki)

Tu Jesus sahat ngolungki, saleleng ni leleng na i

Rap dohot au endehon ma, endengku na imbaru da

Sonang ni tingki i, dung jumpang Jesus Tuhanki

Tondi na mangajari au, tarbaen marlas ni roha au

Sonang ni tingki i, dung jumpang Jesus Tuhanki

18. PARSURUON: (… jongjong…)

P: Hamu angka dongan, nunga itadai jala tahalashon pasu-pasu ni Debata marhite parbue ni na taula di pesta gotilon sadarion. Songon ni dok ni umpasa ma dohonku: Langit di atas ni simanjujung, tano sai ni degehon; Manumpak ma Debata, sahat hita matua bulung, dilehon tua dohot hadameon.

H : Ima tutu… Pinuji ma Tuhan i

P: Horas ma tondi madingin, pirma tondi matogu; sai Tuhanta ma namangiring-iring asa leleng hita mangolu…

H : Ima tutu… Pinuji ma Tuhan i

P : Sahat-sahat ni solu, sahat ma tu bontean, nunga sahat dipatupa hurianta pesta gotilon sadarion; sahat ma hadameon, sahat ma las ni roha, mangolu ma hita dibagasan na masihaholongan.

H : Ima tutu… pinuji ma Tuhan i

P: Borhat ma hamu tu ngolu siganup ari, rade ma ho siboan dame tu nahumaliangmu, paima ma sangkap dohot lomo ni roha ni Debata. Molo adong di ho, hasonangkon mai dibagasan serep ni roha, alai molo pogos ho unang tihai Debata. Haposi ma Tuhanmu na tuk mangaramoti ngolum. Didok angka natua-tua: Rupa do dang boi muba, alai pangalaho boi do tarpauba. Habang binsak-binsak, siruba-ruba dohot ambaroba – Sai unang jolo hona insak hita, asa pinauba roha. Ringkot do na mananda diri. Oloi ma Debata Jala pauba roham

19. TANGIANG PANUTUP: PELEAN – ALE AMANAMI – PASUPASU

II. Pesta Gotilon

1. Hata huhuasi Sian Panitia

2. Pahepenghon angka silua

3. Marsipanganon

NB : Unang manigor mulak hita dung simpul minggu ta ihuthon ma ulaon bolonon sahat tu nasimpul sude hita ruas ni huriant

III. Acara di Alaman ni Gareja

Dung simpul sian Gareja Rap udur ma saluhut ruas nang parhalado tu Halaman Gareja , manguduti acara syukuran

Panitia dohot Parhalado marbaris di jolo ( Sude ruas marhaliang )

PAMUHAI

Pdt: Na marpungu do hita ruas ni huria HKBP Tigalingga Resort Tigalingga on, marlas ni roha, maria-ria jala marolop-olop manghalashon denggan basa ni Jahowa di Pestanta sadarion Ibana do mual ni pasu-pasu dohot hangoluanta. Nuaeng pe pataridahononta ma parsombaonta, panindangionta, dohot las ni rohanta di pasu-pasu ni Jahowa naung tajalo, marhitehite budaya ha-Batakontai

Antong amang pangual pargonsi:

Alu-aluhon ma jolo tu Debata Ama, na manompa langit dohot tano on, dohot nasa isina, ima TUHAN JAHOWA, Ama na hutanda hami di bagasan goarni AnakNa Jesus Kristus. ……(manghuling taganing)…..

Alu-aluhon ma tu Tuhan Jesus Kristus, Anak ni Debata na sasada i, na paluahon hami sian dosadohot hamatean marhite mudarNa na badia i . …(manghuling taganing)…..

Alu-aluhon ma tu Tondi Porbadia na ruar sian Ama i dohot sian AnakNa Tuhan Jesus Kristus, na pajongjong huria na badia i. …… (manghuling taganing)……

Pdt: Nunga dialu-aluhon hamu be tu Debata Ama, AnakNa Tuhan Jesus Kristus, dohot Tondi Parbadia. On pe Amang panggual pargonsi, na marmula do nasa na adong, jala Debata do haroroan ni saluhutna!

Nuaeng bahen damang ma jolo gondang mula-mula laos padomu ma dohot gondang somba-somba i, asa jolo marsomba hami tu jolo ni Tuhan, Debata Jahowa na sasada i, na tumompa langit dohot tano on, dohot tu AnakNa Tuhan Jesus Kristus naung mate humophop hita jala mulak mangolu, dohot tu Tondi Porbadia na mangalehon hasesaan ni dosa, las ni roha dohot ngolu na imbaru na so ra suda i”. bahen damang ma gondang somba sombai

—- manortor ruas di inganannabe tortor somba-somba—-

Panitia: Nunga Husomba hami be Tuhan Jahowa marhite tangan, simanjujung, dohot roha. Nuaeng pe amang panggual pargonsi, naeng liathononnami ma Kristus silehon pasu-pasu, songon panindangion nami tu portibion, alani: bahen damang ma gondang liat-liat i, asa mangaliat hami manghalashon jala manghamauliatehon pasu-pasu ni Debata naung sahat tu hami be, asa mangaliat hami mangolophon hangoluan naung pinatupa nl Tuhan Jesus i, asa mangaliat hami mamaritahon Barita na Uli jala patupahon ulaon asi ni roha I, asa Hat hahorasan, Hat las ni roha, Hat hadameon, Hat hasonangan tubangsonami. Baen damang ma gondang liat liat i

–— manortor ruas diinganannabe tortor liat-liat….

Parhalado : Tu hita saluhut na liat na lolo, nunga taliathon tortorta pataridahon panindangionta taringot tu denggan basa ni Jahowa di Pesta Gotilon on, jala nunga tapatuduhon parsombaonta tu Jesus Kristus si lehon pasu-pasu tu ngolunta. Ibana do Raja na mamasu-masu boni ni angka na taula, jala laos Ibana do silehon hangoluan di hita. Asa Lomak ma silinjuang lomak so binaoboan manang tu dia pe sude ruas ni HKBP Tigalingga mangalangka sai tusi ma dapotan pangomoan, asa balintang ma pagabe tumandakhon sitadoan ari ni ruas ni hurianta do gabe as sanggar ma amporik di ruang ma satua sinur na pinahan gabe naniula, horas ma pardalan dalan mangomo nang partigatga, sai simbur magodang ma angka dakdanak songon uloson porapora, songoni ma angka namagodang sai penggeng saor matua, songoni nang negaranta anggiat lam tu majuna Bahen damang gondang siampapaga na lomak i padomu damang ma tu gondang sampur marmemei, dohot sampur marorot i asa diparorot Tuhani i hitaon saluhutna , asa rintar songon boning di gala, tio songon mata ni mual, jumpang na jinalahan dapot na ni luluan, bahen damang ma gondang nai

- manortor ruas diinganannabe huhut mangaliat, laos dison ma panitia, dohot parhalado mangaliat songon na mangolop olopi ruas saluhutna-

Natuatua : Nunga dibahen damang gondang siampapaga nalomaki, laos dipadomu damang tu gondang sampur marmemei, jala nunga mangaliat hami liat ma hagabeon liat ma hamonangan, asa bahen damang ma gondang didang didang i, asa mandidang anak dohot boru hami ruas ni Huriaon, Tuhanta namamasumasu hita dohot mandidang sude ruasNa, Bahen damang ma gondang nai

-manortor ruas diinganannabe tortor didang didang-.

Ruas : Songon ni dok ni umpama: Ansimun sada holbung, pege sangkarimpang; Manimbung rap tu toru, mangangkat rap tu ginjang dapot ma hasadaon Songon ni dok ni umpasa ma dohonku: Langit di atas ni simanjujung, tano sai ni degehon; Manumpak ma Debata, sahat hita matua bulung, dilehon tua dohot hadameon. Sahat-sahat ni solu, sahat ma tu bontean, nunga sahat dipatupa hurianta pesta gotilon sadarion; sahat ma hadameon, sahat ma las ni roha, mangolu ma hita dibagasan na masihaholongan. Antong “Amang panggual pargonsi, bahen damang ma gondang sitio-tio i, asa tongtong tio ulaonnami jala tiur ngolunami, tangkas parrohaonnami jala torang pingkirannami, pita haporseaonnami jala polin holongnami. Laos padomu ma dohot gondang hasahatan i, siala nunga sahat Barita na Uli tu hami, na mamaritahon asa huria na mangulahon ulaon parasinirohaon hami. Baen damang ma gondang sitiotioi laos padomuma tu gondang hasahatan i

–— manortor ruas diinganannabe tortor hasahatan huhut mandok horas 3 X….

TORTOR SEKTOR- SEKTOR

1 . Sektor I dohot VI

2. Sektor II Dohot V

3. Sektor III Dohot IV

4. Tortor Singkola Minggu

5. Tortor Remaja Naposo

6. Tortor Pangujungi

MANGULA HITA JOLMA MANABUR BONI I

ALAI ANGGO JADINA DI DEBATA DOI