HURIA NA MANGULAHON ULAON PARASINIROHAON (Jesaya 58: 4—12)

BAHAN SERMON HKBP RESSORT TIGALINGGA

MINGGU XXII DUNG TRINITATIS, 28 OKTOBER 2018

HURIA NA MANGULAHON ULAON PARASINIROHAON

(Jesaya 58: 4—12)

I.      PATUJOLO

Buku Jesaya diyakini buku na sinurat ni Si Jesaya. Buku on digurithon saleleng panghobasion ni si Jesaya di tongatonga ni bangso Juda (Israel Selatan) andorang so habuangan babel. Bagian-bagian ni buku Jesaya on ima: 1) Proto Jesaya (bindu 1-39) Panurirangon ni si Jesaya taringot habuangan babel; 2) Deutro Jesaya (bindu 40-55) Apulapul taringot tu Haluaon marhitehite Mesias; 3) Trito Jesaya (bindu 56-66) Panggohion ni Haluaon dohot Ruhutruhutna. Turpuk ta on (Jesaya 58: 4-12), ima ponggol patoluhon taringot tu ruhutruhut ni ngolu naung di bagasan haluaon. Turpuk on ima tona Debata tu deba bangso Israel naung mulak sian habuangan Babel, ima angka na parjolo mulak (perintis) sian Babel.

II.      HATORANGAN NI TURPUK

·         Ay. 4-5. Marpuasa ima sada ritual ni halak Isreal naung ditontuhon Debata asa diulahon halak Israel. Nunga adong ritual i mamungka sian buku 3 Musa. Jadi, nunga adong ritual marpuasa di bangso Israel uju di parhorsihan dope nasida (3 Musa 16:29) . Alanii, nunga tung leleng jala dihasomalhon nasida marpuasa. Tujuan ni marpuasa ima asa ditangihon Debata Jahowa pangidoan nasida jala dipasaut (2 Sam. 12: 16-23; Ezra 8: 21-23; Ester 4:16). Di Jesaya 58: 3 tangkas dipaboa ai marungutungut bangso i ala dang ditangihon Debata nasida nang pe nunga marpuasa. Hape dipaandar do muse ai sala do pangantusion ni bangso i taringot tu namarpuasa.Manang ndang diantusi nasida lapatan ritual marpuasa.Ai holan ndang mangan jala ndang minum do nasida namarpuasa i, hape dang denggan pangalahona tu donganna jolma. Na lobi jahat muse ai laho mambahen bada dohot parsalisian do puasa nasida. Ala nii, didok Debata unang ma marpuasa hamu molo puasa nasongon i do na diulahon hamu, ai ndang tagamon sahat soaramuna tu banua ginjang. Jadi, nang pe diulahon bangso i ritual puasa songon na niaturhon si Musa(ditontuhon arina, dipatungki uluna, jala marpahean di hori dohot abu), alai dang ritual i na hinalomohon ni Debata.

·         Ay. 6-10. Boi dohonon uju dijalo bangso i hatontuan marpuasa ndang dipaboa dope lapatan ni marpuasa tu nasida. Marhitehite ayat on, dipatorang Debata ma aha do lapatan ni marpuasa. Sain turpuk on dipajojor ma lapatan ni marpuasa ima: paluahon na tertindas; mangurupi jolma na male, na pogos, na mampar, na so marpahean, dln. Jala mangurupi sude jolma na ringkot urupan (bnd. Luk. 4:16-19). Molo diulahon do i, ido asa tangkas hita naung mangolu di bagasan hatiuron dohot hasintongan ni Debata. Dung i, molo jaoujou nasida tangihonon ni Jahowa Debata ma.

·         Ay. 11-12. Jaminan sian Debata, asal ma mangolu di bagasan ngolu parasinirohanon tu dongan jolma, sai na donganan ni Debata do jala tongtong di togutogu, jala dipasabam Debata nasida di dia pe bangso i mangolu, di inganan na rahar manang na lambok. Ndang tagamon be nasida hahurangan, gariada marlobilobi gabe manghorhon pasupasu tu na humaliang na. Marhitehite pasupasu ni Debata, boi ma nasida muse dohot angka pinomparna paulihon huta Jerusalem naung maharhar i hian.

III.      SIPAHUSORHUSORON

Marhitehite turpuk on tangkas dipaandar tu hita, ia ngolu haporseaon ndada ngolu na bersifat ritual manang seremonial. Unang didok rohanta molo nunga taulahon ngolu haporseaonta marhitehite angka peribadahan (isarani marminggu, mandohoti partangiangan lingkungan, martangiang pribadi, mandohoti persekutuan kategorial/seksi) nunga singkop be ngolu haporseanta di Debata. Molo holan ritual keagamaan do na taulahon, ndang tagamon sahat soaranta tu Debata. Alai tangkas do didok ia na hihalomohon ni Debata, ima ngolu haporseaon di bagasan parasinirohaon tu dongan jolma. Ido ngolu haporseaon na di bagasan hatiuron dohot hasintongan ni Debata, jala soara nasida do na ditangihon Debata.

SERMON PARHALADO HKBP RESSORT TIGALINGGA DISTRIK VI DAIRI JAMITA MINGGU XV DUNG TRINITATIS, 09 SEPTEMBER 2018 Ev: 2 Kor. 11:7—16 Ep: Jeremia 28: 7-14 MANGOLU DI BAGASAN HASINTONGAN NI KRISTUS (2 Korint 11: 7-16)

SERMON PARHALADO HKBP RESSORT TIGALINGGA DISTRIK VI DAIRI

JAMITA MINGGU XV DUNG TRINITATIS, 09 SEPTEMBER 2018

Ev: 2 Kor. 11:7—16     Ep: Jeremia 28: 7-14

MANGOLU DI BAGASAN HASINTONGAN NI KRISTUS

(2 Korint 11: 7-16)

Patujolo

Huta Korint, ima huta pelabuhan na mansai balga. songon huta pelabuhan na balga, marragam do pangisi ni huta on, jala sude angka ragam ni pangalaho dohot pengajarion masa do di huta on. Huria Korint, ima huria na pinajongjong ni Apostel Paulus. Ala ni i, nang pe ndang di huta Korint be si Paulus, tongtong diparmahani ibana huria i marhitehite surat. Borat do hamaolon ni si Paulus maradophon huria Korint, huria na balga do on nian alai godang do pangalaho na hurang denggan ni angka ruasna ala naung somal manghangoluhon ngolu pardagingon, suang songon i nang hamaolon mangadopi angka pangajari na adong di huria i, na mangajarhon angka pangajarion na marasing sian pangajarion ni si Paulus taringot tu Jesus Kristus. Ndada holan i, didok angka pangajari i do si Paulus ndang tutu apostel ni Jesus (ndang termasuk si Paulus sian 12 Apostel ni Jesus), jala dang tingkos angka na niajarhonna. Alani angka hamaolon maradophon huria i, saleleng mangula si Paulus disi dang dijalo balanjona alai karejo do ibana songon partonun (tenda), asa marimbar ibana sian angka pangajari na asing (apostel pargapgap) na holan mambuat hepeng ni huria i. Jadi, songon surat pembelaan ni Si Paulus do turpukta on tu huria i maralohon angka apostel pargapgap na mangajari di huria i.

Hatorangan ni Turpuk

·         Silehonlehon do pangulaon ni si Paulus di Huria Korintus.Saleleng manghobasi huta Korint si Paulus mamaritahon Barita na Uli, dang dijalo ibana balanjona sian huria i. Karejo do ibana songon partonun (tukang tenda) asa adong balanjona, jala molo adong na hurang dope huria Makedonia do patukhon. Hape huria Makedonia ima sada huria na metmet, alai sian huria i do tarjalo ni si Paulus pangurupion ala sian ias ni roha nasida mangurupi.Ala ni i, silehonlehon do tu huria Korint pangulaon ni si Paulus. Ndang ala na so Apostel ni Jesus ibana asa ndang dijalo ibana balanjo sian huria i. Alai asa adong do imbar ni si Paulus sian angka apostel pargapgap na mangula di huria i.

·         Mangolu di bagasan hasintongan ni Kristus. Mangolu di bagasan hasintongan ni Kristus tangkas dipatudu si Paulus marhitehite na so manarihon na ringkot di dirina sandiri (tidak mementingkan diri sendiri). Tujuan ni si Paulus mamaritahon Barita na Uli, ima asa dapotan parsaulian huria i marhitehite Barita na Uli na pinasahat na. Ndang asa dapotan ngolungolu ibana sian i. Sada kebanggan ni si Paulus, ala boi ibana mamaritahon Barita na Uli di bagasan hasintongan ni Kristus ndang marna montok di luat Akaya, ndada laho manarihon na ringkot di dirina sandiri. Memang gabe hira haotoon do di huria i, ala ndang dijalo si Paulus balanjona saleleng mangula di huria i. Alai sada kebanggaan do i diibana, nang pe gabe haotoon i di nadeba. Asa tandi halak na mangolu di bagasan hasintongan ni Kristus sian na asing na holan manarihon dirina sandiri. Alai ndanng na mandok sala manjalo upa sian halojaon niba mangula di huria (1 Kor. 9:13-14)

·         Apostel pargapgap na holan manarihon diri nasida sandiri.

Tagkas disurat on, na adong do apostel pargapgap di huria Korint. Didok do nasida na pasumansuman dirina songon apostel ni Kristus. Boi do masa songon i di tongatonga ni huria. Sibolis pe dipasumansuman do dirina songon suruan hatiuron. Tujuan ni nasida gabe apostel pargapgap ima as dapotan upa nasida mangula di huria i. Ndada holan i, barita na pinasahat nasida pe ndada Barita na Uli taringot tu Tuhan Jesus, alai ajaran-ajaran filsafat gnostik na masa di huta Korint do diboan nasida tu huria. Ala ni i, do dipaimbar si Paulus dirina sian angka apostel pargapgap i, asa ditanda ruas i nasida sian parange nasida be.

Sipahusorhusoron

·         Mangolu di bagasan hasintongan ni Kristus, marlapatan do dang manarihon diri sandiri molo mangulahon nasa ulaonta, tarumobi ma ulaon di tongatonga ni huria.

·         Uang ma olo hita menyalahgunakan wewenang manang kedudukannta,  asa dapotan hita lobi sian naung ditotophon tu hita.

·         Ndang adong na singkop di portibion, pangula ni huria pe adong do hahuranganna. Marasing sudut pandang marasing do kesimpuan ni ruas taringot tu panghobasion ni pangula ni huria. Ala nii, ringkot do manangianghon angka pangula ni huria asa margogo jala ringgas marhobas di huria i, unang ma holan mangkritik hita nasida. ( CPdt Hendra Sirait.SSi)

BAHAN SERMON HKBP RESSORT TIGALINGGA MINGGU XIX DUNG TRINITATIS, 07 OKTOBER 2018 GABE PARBARITA NA ULI (2 TIMOTEUS 4: 1—5)

BAHAN SERMON HKBP RESSORT TIGALINGGA

MINGGU XIX DUNG TRINITATIS, 07 OKTOBER 2018

GABE PARBARITA NA ULI

(2 TIMOTEUS 4: 1—5)

I.      PATUJOLO

Surat 1&2 Timoteus digoari do surat-surat Pastoral (parmahanion) na sian si Paulus tu si Timoteus na manguluhon Huria Epesus (1 Tim 1:3). Si Timoteus ima sahalak Yunani-Jahudi naung porsea di Jesus Kristus sian hametmetonna, ala nungga porsea di Jesus ompungna dohot inongna (2 Tim 1:5). Lam tang do haporseaon ni si Paulus dung marsiajar ibana tu si Paulus, jala digoari si Paulus do ibana anak di bagasan haporseaon (2 Tim 1:2). Gabe dongan saulaon ni Si Paulus do ibana pararathon Barita na Uli. Jala tongtong do diparrohahon si Paulus panghobasion ni si Timoteus dohot pergumulanna manguluhon huria Epesus. Persoalan na balga di huria na niuluhon ni si Timoteus ima nunga lam rarat parpoda haliluon di huria i. Gabe dipengaruhi angka ruas ni huria asa manimbil sian na niajarhon ni si Paulus dohot si Timoteus. Ala ni i ikkon marsitutu jala ingkon berjuang keras do si Timoteus mangalo parpoda haliluon i marhitehite na marsihohot manjamitahon Barita na Uli na polin.

II.      HATORANGAN NI TURPUK

·         Ay.1-2. Tona na mansai ringkot do tona ni si Paulus tu si Timoteus, pola didok ibana,”di jolo ni Debata dohot Kristus na ro manguhum na mangolu dohot na mate, huhantindanghon hapataronNa nang harajaonNa” Ndada na ringkot di si Paulus parsuruonna tu si Timoteus, ala sian Debata dohot sian Kristus do parsuruon i. Asa unang mago nanggo sahalak jolma i, molo ro tingki panguhuman sogot. Umbahen i do asa ndang boi marlembalemba laho Barita na Uli, alai une manang ndang une tingkina (ikkon ganup tingki) ikkon baritahonon do Barita na Uli na mamolin, marhitehite na maminsang, mangapoi, paingothon sude ruas ni huria di bagasan pamodaion dohot lambas ni roha. Unang be sai marapaima, alai humatop ma diulahon. Molo marpaima laho mangajarhon Barita na Uli na mamamolin, lam rarat ma poda haliluon i di tongatonga ni huria i, jala lam maol ma patingkoson.

·         Ay.3-4. Marsiadu dohot tingki do tugas marbarita na Uli. Didok si Paulus do, na ro ma tingkina ndang tartahan halak disi poda na tingkos (orang tidak lagi menerima ajaran sehat), holan na nihalomohon nasida do di bege nasida. Molo nunga jumpang songon, gabe sisogo do pangajari na mangajarhon hasintongan ni Barita na Uli ni Jesus Kristus. Ai luar biasa do pengaruh ni Filsafat Junani di ngolu ni ruas di Epesus, ima marhitehite angka halak Jahudi-Kristen naung lam bagas parbinotoan nasida di angka filsafat Junani. Adong tafsiran na mandok ajaran Gnostik do na didok si Paulus songon “turiturian” (dongeng). Ala ni i, ikkon otapan ni Si Timoteus do pengaruh ajaran i sian tongatonga ni ruas. Ikkon ndang mansohot ibana mangalo angka poda haliluon (berlomba dengan waktu) asa unang sanga terlena angka ruas i di poda haliluon i, gabe ndang tarjalo nasida be Barita na Uli na sintong jala na mamolin.

·         Ay.5. Ala borat do paraloan ni si Timoteus mangadopi sude parpoda haliluon dohot angka ruas naung dipengaruhi poda haliluon i, dipodai si Paulus ibana ada bai menguasai diri (unang mabuk rohana), asa manahan na jat, jala tongtong diradoti ulaon marbarita na Uli marhitehite na sahat diula tohonanna. Asa unang gabe muruk, manang mandele, manang mansohot ibana sian ulaon pararathon Barita na Uli na mamolin. Umbahen i do tongtong dilehon si Paulus di ibana semangat dohot dukungan asa sahat diula tohonanna.

III.      SIPAHUSORHUSORON

·         Sian turpuk on, diondolhon do ingkon hajongjonghhon do Barita na Uli na mamolin di ganup tingki, une manang ndang une tingkina. Ai ndang hita manontuhon sadihari ma tingki na une Barita na Uli i pasahaton jala manghorhon na denggan tu na umbegesa.

·         Lam godang parbinotoan ni portibion jala lam malo angka jolma i, gabe lam maol tarjalo nasida Barita na Uli. Nunga gabe pikkiran nasida sandiri be diandalhon. Dipartingkian nuaeng nunga lam rarat be ajaran Atheis (tidak ada Tuhan), na so manghaporseai na adong Tuhan. Ai ndang tarjalo ni angkal Tuhan i dohot harajaonNa.

·         Di partingkian nuaeng, angka dia ma na boi gabe pangambati dohot tantangan laho pasahathon Barita na Uli na mamolin tu na humaliang hita? Amen ( CPdt Hendra Sirait SSi )

BAHAN SERMON HKBP RESSORT TIGALINGGA MINGGU XXIII DUNG TRINITATIS, 04 NOVEMBER 2018 PARATARATA MA SILEHONLEHON NI DEBATA NA SAHAT TU HO (2 Timoteus 1: 6—12)

BAHAN SERMON HKBP RESSORT TIGALINGGA

MINGGU XXIII DUNG TRINITATIS, 04 NOVEMBER 2018

PARATARATA MA SILEHONLEHON NI DEBATA NA SAHAT TU HO

(2 Timoteus 1: 6—12)

I.      PATUJOLO

Surat ni si Paulus tu si Timoteus digoari do surat parmahanion (penggembalaan). Ai anak ni si Paulus do si Timoteus di bagasan haporseaon (1 Tim 1:2). Dipasahat si Paulus do Huria Epesus asa diuluhon si Timoteus (1 Tim 1:3). Songon sada anak di bagasan haporseaon, diparrohahon si Paulus do panghobasion ni si Timoteus di Huria Epesus tarlumobi ma asa margogo ibana mangadopi angka hamaolon na manguluhon huria i. Hamaolon na diadopi si Timoteus di Huria Epesus ima ala nunga lam rarat parpoda haliliuon. Angka na pistar do parpoda haliliuon i, gabe lomoan roha ni ruas manangihon pangajarion sian nasida asa Barita na Uli ni Jesus Kristus. Ala nii, gabe songon na maila do si Timoteus pasahathon Barita na Uli ni Jesus Kristus ala hurang dapot di angkal ni angka ruas i. Umbahen i do asa dipodai si Paulus si Timoteus unang gabe maila, tahutan,  manang sumurut ibana laho pararathon Barita na Uli ni Tuhan Jesus.

II.      HATORANGAN NI TURPUK

Tangkas do diboto si Paulus haporseaon ni si Timoteus di Jesus Kristus (2 Tim 1: 5), ala nii do dang ganggu roha ni si Paulus mangampehon tanganna tu si Timoteus. Ai basabasa ni Debata do haporseaon na adong di ibana, lumobi ma na diampehon si Paulus tanganna tu si Timoteus songon sada simbol naung dipadiri Debata ibana gabe Parbarita na Uli (ay. 6). Mangampehon tangan ima simbol na pasahathon Tondi Parbadia, jotjot digombarhon songon api. Ai Debata do na pasahathon silehonlehon i, ndada silehonlehon ni jolma i. Tondi Parbadia ido na mamatri (materai) haporseaon tu Barita na Uli di bangasan hita, ima na ringkot paratarataon (dikobarkan).

Nasa na dipadiri Debata gabe Parbarita na Uli, dilehon do tondi hagogoon, tondi haholongon, tondi pangarajaion diri, ndada tondi hatahuton. Dung dilehon Debata di hita ragam ni tondi i, ndada na gabe ndang adopanta be hamaolon, baliksa nasa na mangolu di bagasan haporseoan di Jesus Kristus gabe godang do jumpang hita hamaolon. Boasa? Ala ndang dihaporseai portibion dope Jesus Kristus, maol tarjalo nasida Barita na Uli. Gabe jotjot ma hita maralo dohot portibi on. Alai ala dilehon do di hita ragam ni tondiNa, gabe margogo hita mangadopi sude hamaolon laho pasahathon Barita na Uli.

Ndang adong alasan gabe maila, tahutan, manang gabe sumurut semangat laho pasahathon Barita na Uli. Panghophopon ni si Paulus di Barita na Uli mambahen ibana gabe tarhurung, alai ndang mabiar ibana. Dirina sandiri gabe sada contoh songon dia manghophop Barita na Uli. Alai dirajumi ibana do na sian Debata do gogona mangulahon i.

Barita na Uli i, ima haluaon na dibasabasahon Debata tu hita di bagasan Jesus Kristus. Jala Barita na Uli i do sibaritahononthon. Marlapatan do i, naung manjalo haluaon tarjou do gabe parbarita. Haluaon dohot tugas parbarita na uli, boi dohonon sada paket silehonlehon manang basabasa ni Debata tu hita. Dang ala ni kemampuan, keahlian, hamaloon, dlna. Alai holan ala basabasa ni Debata do.

Diulangkon si Paulus muse pos ni rohana manghophop Barita na Uli. Dihaposi ibana do, nunga dipasohot Jesus hamatean, jala dipaullop hangoluan dohot hatongtongon. Barita i do Barita na Uli na manjou ibana gabe parjamita, apostel, dohot pangajari. Asa jamitahononna Barita na Uli i, pasahatonna Barita na Uli i, jala ajarhononna Barita na Uli i tu sude jolma. Ndang tartulak ibana panjouon laho pararathon Barita na Uli i. Pola gabe marsitaonon ibana ala marBarita na Uli. Ndang mabiar, ndang maila, jala dang sumurut ibana nang pe godang sitaonon diadopi ibana, ala ditanda ibana Jesus Kristus na tongtong mangaramoti sasude naung pinasahatNa. Molo dipabangkit sasahalak gabe parjamita, apostel, pangajari laho pasahathon Barita na Uli, ramotan ni Tuhan do silehonlehonNa i asa boi marbungaran, ndang gabe malos manang mate.

III.      SIPAHUSORHUSORON

Ringkot dope pararathon Barita na Uli? Ai nungga lam gale, sumurut semangat, jala ndang apala diharingkothon halak Kristen nuaeng be pararathon Barita na Uli. Nunga tung jarang jumpangon halak Kristen manaringoti Barita na Uli di parsaoranna, asing sian di gareja dohot dipartangiangan. Di parmingguan dohot dipartangiangan pe, jojot gabe formalitas do harorona.

Diparhusor ni partingkian, hira rumingkot nama nuaeng mangihuthon angka na masa. Molo jumpang dohot angka dongan, angka kemajuan do dihatai isarani angka parsikkolaan na jago, parkarejoan na beteng, model ni angka pahean terbaru, dlna. Molo angka na poso angka status facebook, instagram, tweeter, dlna. Boasa songon i? Ai dang Barita na Uli i be pergumulan siganup ari ni halak Kristen. Ala nii, ndang pas be molo manaringoti Barita na Uli. Gabe tarlalap ma halak Kristen, ai dang diharingkothon be pararathon Barita na Uli.

Olo do tutu gabe maila iba molo nihataan Barita na Uli, hape dang i na gabe pembahasan ni jolma. Molo di hata nuaeng didok “tidak relevan”.Ndang relevan ala ndang haluaon, hasintongan, dohot ngolu na manongtong be di pergumulhon jolma nuaeng. Dihamajuoan nuaeng, holan mangalului hasonangan diportibion nama pergumulan ni jolma, ndang lao be rohana tu hangoluan sogot. Ndang “relevan be, ala dang diloas pamarenta hita laho pararathon Barita na Uli tu angka donganta naung marugamo. Alai tutu do ndang “relevan” be Barita na Uli? Hot do paghirimon ni jolma di ngolu na manongtong, alai dilalapi portibion jolma i gabe tarlalap.

Situasi na “tidak relevan” on ma na mambahen maila, tahutan, jala gale hita laho pararathon Barita na Uli. Marhite turpuk on, dipaingot hita asa unang gabe sumurut hita pararathon Barita na Uli, alai asa tongtong tarataratahon (semangat berkobar) Barita na Uli tu na humaliang hita. Asa dungo sude jolma i manghaporseai Barita na Uli ni Jesus Kristus, asa unang lalap di portibi na lao salpu on. Amen ( Cpdt Hendra Sirait SSi )

JADWAL/ROSTER PANGHOBASION (MARJAMITA) PANDITA RESSORT DI HKBP RESSORT TIGALINGGA 2018

JADWAL/ROSTER  

PANGHOBASION (MARJAMITA) PANDITA RESSORT

DI HKBP RESSORT TIGALINGGA 2018

NO	MINGGU	INGANAN	KETERANGAN
01	7 Januari               2018	HKBP Batugungun
02	14 Januari             2018	HKBP Tigalingga
03	21 Januari             2018	HKBP Bertungen Julu
04	28 Januari             2018	HKBP Batugungun
05	04 Februari           2018	HKBP  Tigalingga
06	11 Februari           2018	HKBP  Kuta Buluh
07	18 Februari           2018	HKBP Kedeberek
08	25 Februari           2018	HKBP Tanj Beringin
09	04 Maret               2018	HKBP Tigalingga
10	11 Maret               2018	HKBP Pandan II
11	18 Maret               2018	HKBP Sibengkurung
12	25 Maret               2018	HKBP Lau Pangguh
13	30 Maret                   2018	HKBP Tigalingga
14	01 April                2018	HKBP Tigalingga
15	02 April                2018	HKBP Tigalingga
16	08 April                2018	HKBP Buluh Rintang
17	15 April                2018	HKBP Batu Anggan
18	22 April                2018	HKBP Suka Bangun
19	29 April                2018	HKBP Kuta Bulu
20	06 Mei                  2018	HKBP Tigalingga
21	10 Mei                  2018	HKBP Tigalingga
22	13 Mei                  2018	HKBP Batugungun
23	20 Mei                  2018	HKBP Tigalingga
24	21 Mei                  2018	HKBP Tigalingga
25	27 Mei                  2018	HKBP Bertungen Julu
26	03 Juni                  2018	HKBP Tigalingga
27	10 Juni                  2018	HKBP Tanj Beringin
28	17 Juni                  2018	HKBP Tigalingga
29	24 Juni                  2018	HKBP  Kedeberek
30	01 Juli                   2018	HKBP Tigalingga
31	08 Juli                   2018	HKBP Pandan II
32	15 Juli                   2018	HKBP Sibenkurung
33	22 Juli                   2018	HKBP  Lau Pangguh
34	29 Juli                   2018	HKBP Buluh Rintang
35	05 Agustus            2018	HKBP Tigalingga
36	12 Agustus            2018	HKBP Batu Anggan
37	19 Agustus            2018	HKBP Tigalingga
38	26 Agustus            2018	HKBP Suka Bangun
39	02 September        2018	HKBP Tigalingga
40	09 September        2018	HKBP Tanj Beringin
41	16 September        2018	HKBP Tigalingga
42	23  September       2018	HKBP Batu Gungun
43	30 September        2018	HKBP Kuta Buluh
44	07 Oktober           2018	HKBP Tigalingga
45	14      Oktober      2018	HKBP Batu Gungun
46	21 Oktober           2018	HKBP Tigalingga
47	28 Oktober           2018	HKBP Bertungen
48	04 Nopember       2018	HKBP Tigalingga
49	11 Nopember       2018	HKBP Pandan II
50	18  Nopember      2018	HKBP Lau Pangguh
51	25 Nopember      2018	HKBP Tigalingga
52	02 Desember       2018	HKBP  Batugungun
53	09 Desember       2018	HKBP Tigalingga
54	16 Desember       2018	HKBP Kedeberk
55	23Desember       2018	HKBP Tanj Beringin
56	25 Desember      2018	HKBP Tigalingga
57	26 Desember      2018	HKBP Batu Gun-gun
58	30 Desember      2018	HKBP BertungenJulu
59	31 Desember      2018   (Bodari )	HKBP Tigalingga
60	01 Januari          2019	HKBP Tigalingga

Catt : Boi marubah do roster on molo tung adong angka ulaon na mansai ronsot

Tigalingga , 11 Februari 2016

Pandita

HKBP Ressort Tigalingga

Pdt. Budianto Sianturi